മലപ്പുറം - വിദ്യാര്‍ത്ഥിയെ ശകാരിച്ചതിന് അധ്യാപകനെ മര്‍ദ്ദിച്ച ശേഷം കൈ തല്ലിയൊടിച്ചു. കുറ്റിപ്പുറം പേരശ്ശനൂര്‍ ഗവ. ഹയര്‍ സെക്കന്‍ഡറി സ്‌കൂ അധ്യാപകനായ സജീഷിനാണ് പ്ലസ് വണ്‍ വിദ്യാര്‍ഥിയുടെ മര്‍ദ്ദനമേറ്റത്. പ്രിന്‍സിപ്പലിന്റെ മുന്നില്‍വെച്ചായിരുന്നു സംഭവം. മര്‍ദ്ദനത്തില്‍ അധ്യാപകന്റെ കൈക്കുഴ വേര്‍പെട്ടു. കലോത്സവ പരിശീലനം നടത്തുന്ന സ്ഥലത്ത് കറങ്ങി നടന്നതിന് അധ്യാപകന്‍ വിദ്യാര്‍ഥിയെ ശകാരിച്ചിരുന്നു. സംഭവത്തില്‍ കുറ്റിപ്പുറം പൊലീസ് ജുവനൈല്‍ ജസ്റ്റിസ് ബോര്‍ഡിന് റിപ്പോര്‍ട്ട് കൈമാറി. ഉപജില്ലാ കലോത്സവത്തിനായി പെണ്‍കുട്ടികള്‍ പരിശീലനം നടത്തുന്ന സ്ഥലത്ത് കറങ്ങി നടന്ന വിദ്യാര്‍ഥികളെ അധ്യാപകന്‍ ശകാരിക്കുകയും വ പ്രിന്‍സിപ്പലിന് മുന്നിലെത്തിക്കുകയും ചെയ്തു. പ്രിന്‍സിപ്പലിന് മുന്നില്‍ പ്രകോപിതനായ വിദ്യാര്‍ഥി അധ്യാപകനെ മര്‍ദിക്കുകയായിരുന്നു. അധ്യാപകന്റെ കൈ പിന്നിലേക്ക് തിരിച്ച് പുറത്ത് ചവിട്ടുകയായിരുന്നുവെന്നാണ് പരാതിയില്‍ പറയുന്നു. സജീഷ് ഗവ. താലൂക്ക് ആശുപത്രിയില്‍ ചികിത്സ തേടി.
