ഗാസ- ഈ രാത്രി വെളുക്കുമ്പോള് ഗാസ ഉണ്ടാകുമോ. ഇരുട്ടിലാണ്ട് കിടക്കുന്ന ഗാസയില് നിലക്കാതെ ബോംബിടുകയാണ് ഇസ്രായില് പോര് വിമാനങ്ങള്. അല് അഖ്സ ആശുപത്രിയില് ബോംബ് വീണതായി റിപ്പോര്ട്ടുണ്ട്. വാര്ത്താ വിനിമയ ബന്ധങ്ങള് പൂര്ണമായും വിച്ഛേദിക്കപ്പെട്ടിരിക്കുകയാണ്.
അല്-ഖസ്സാം ബ്രിഗേഡ്സും ഇസ്രായില് സേനയും തമ്മില് മൂന്ന് സ്ഥലങ്ങളില് ഏറ്റുമുട്ടലുകള് നടക്കുന്നുണ്ടെന്ന് അല് ജസീറ പറയുന്നു. ഇപ്പോള് ഇസ്രായേലി പീരങ്കികള് അതിര്ത്തി രേഖക്ക് കുറുകെ കനത്ത ബോംബാക്രമണം പുനരാരംഭിച്ചിട്ടുണ്ട്.
''ഞാന് എന്റെ കെട്ടിടത്തിന്റെ മേല്ക്കൂരയിലാണ് നില്ക്കുന്നത്, അതിര്ത്തിയില് ഇസ്രായില് പീരങ്കികളുടെ മിന്നല് വീശുന്നത് കാണാന് കഴിഞ്ഞു. അതിര്ത്തിക്ക് സമീപം മൂന്ന് വ്യത്യസ്ത സ്ഥലങ്ങളില് ഏറ്റുമുട്ടലുകള് നടക്കുന്നതായി അല്-ഖസം ബ്രിഗേഡുകളില്നിന്ന് ഞങ്ങള്ക്ക് ഒരു സന്ദേശം ലഭിച്ചു.
'ഒന്ന് ഗാസ മുനമ്പിന്റെ മധ്യഭാഗത്തുള്ള അല്-ബ്രെയ്ജിന് കിഴക്കാണ്, മറ്റുള്ളവ ഗാസ നഗരത്തിന് കിഴക്കും ഗാസ സ്ട്രിപ്പിന്റെ വടക്കുഭാഗത്തുമാണ്. ഈ വെടിവെപ്പില് വ്യത്യസ്ത തരം ആയുധങ്ങള് ഉപയോഗിക്കുന്നതായും അവര് പറഞ്ഞതായി അല് ജസീറ ലേഖകന് റിപ്പോര്ട്ട് ചെയ്യുന്നു.
ഗാസയിലെ തങ്ങളുടെ ജീവനക്കാരുമായുള്ള ബന്ധം നഷ്ടപ്പെട്ടതായി സന്നദ്ധ സംഘടനകള് അറിയിച്ചു.
ലോകാരോഗ്യ സംഘടനയും യുനിസെഫും തങ്ങളുടെ ടീമുകളുമായി ആശയവിനിമയം നടത്താന് കഴിയുന്നില്ലെന്ന് പറഞ്ഞു.
'ഈ ഉപരോധം ജനങ്ങളുടെ സുരക്ഷിതത്വത്തെക്കുറിച്ചും ദുര്ബലരായ രോഗികളുടെ അവസ്ഥയെക്കുറിച്ചും എന്നെ വളരെയധികം ഉത്കണ്ഠാകുലനാക്കുന്നു,'' ഡബ്ല്യുഎച്ച്ഒ മേധാവി ടെഡ്രോസ് ഗെബ്രിയേസസ് എക്സില് പോസ്റ്റ് ചെയ്തു.
ഫലസ്തീന് റെഡ് ക്രസന്റ് സൊസൈറ്റിയും ഡോക്ടേഴ്സ് വിത്തൗട്ട് ബോര്ഡേഴ്സും (എംഎസ്എഫ്) - കൂടാതെ ക്വാക്കര് അമേരിക്കന് ഫ്രണ്ട്സ് സര്വീസ് കമ്മിറ്റി, യുകെ, ലെബനന് ആസ്ഥാനമായുള്ള ഫലസ്തീനികള്, ആക്ഷന് എയ്ഡ് യു.കെ എന്നിവയുള്പ്പെടെയുള്ള മറ്റ് ഗ്രൂപ്പുകളും തങ്ങള്ക്ക് സ്റ്റാഫിനെ ബന്ധപ്പെടാന് കഴിയുന്നില്ലെന്ന് പറഞ്ഞു.
