ബ്രസല്‍സ്- ബ്രസല്‍സില്‍ രണ്ട് സ്വീഡിഷ് ഫുട്‌ബോള്‍ ആരാധകരെ കൊലപ്പെടുത്തിയെന്ന് സംശയിക്കുന്ന ടുണീഷ്യന്‍ തോക്കുധാരി ചൊവ്വാഴ്ച കഫേയില്‍ പോലീസ് വെടിയേറ്റ് മരിച്ചു. യൂറോപ്പ് സുരക്ഷ ശക്തിപ്പെടുത്തണമെന്ന് സ്വീഡന്‍ പ്രധാനമന്ത്രി പറഞ്ഞു.
45 കാരനായ അക്രമി ഓണ്‍ലൈനില്‍ പോസ്റ്റ് ചെയ്ത വീഡിയോയില്‍ ഇസ്ലാമിക് സ്‌റ്റേറ്റ് അംഗമാണെന്ന് പറയുകയും ആക്രമണത്തിന്റെ ഉത്തരവാദിത്തം ഏറ്റെടുക്കുകയും ചെയ്തിരുന്നു. തിങ്കളാഴ്ച രാത്രി സെന്‍ട്രല്‍ ബ്രസല്‍സില്‍ മറ്റൊരു സ്വീഡിഷ് പൗരനെ ഇയാള്‍ ആക്രമിച്ചതായും സംശയിക്കുന്നു.
'ഭീകരര്‍ ഞങ്ങളെ ഭയപ്പെടുത്തി അനുസരണത്തിലേക്കും നിശബ്ദതയിലേക്കും നയിക്കാന്‍ ആഗ്രഹിക്കുന്നു. അത് നടക്കില്ല,' സ്വീഡിഷ് പ്രധാനമന്ത്രി ഉള്‍ഫ് ക്രിസ്‌റ്റേഴ്‌സണ്‍ സ്‌റ്റോക്ക്‌ഹോമില്‍ നടത്തിയ വാര്‍ത്താ സമ്മേളനത്തില്‍ പറഞ്ഞു. ഇത് കൂടുതല്‍ സുരക്ഷക്കുള്ള സമയമാണ്, ഞങ്ങള്‍ക്ക് നിഷ്‌കളങ്കരായിക്കാന്‍ കഴിയില്ല- ക്രിസ്‌റ്റേഴ്‌സണ്‍ പറഞ്ഞു, സ്വീഡനും യൂറോപ്യന്‍ യൂണിയനും അതിര്‍ത്തികള്‍ സംരക്ഷിക്കേണ്ടതുണ്ടെന്ന് അദ്ദേഹം കൂട്ടിച്ചേര്‍ത്തു.
ഇസ്രായില്‍- ഹമാസ് സംഘര്‍ഷവുമായി ബന്ധപ്പെട്ട് ചില യൂറോപ്യന്‍ രാജ്യങ്ങളില്‍ സുരക്ഷാ ആശങ്കകള്‍ ഉയര്‍ന്ന സമയത്താണ് വെടിവെപ്പ് നടന്നത്, എന്നാല്‍ ഗാസ സംഘര്‍ഷവുമായി ആക്രമണത്തിന് ബന്ധമുണ്ടെന്നതിന് തെളിവുകളില്ലെന്ന് ബെല്‍ജിയന്‍ ഫെഡറല്‍ പ്രോസിക്യൂട്ടര്‍ പറഞ്ഞു.
