തൃശൂര് - കരുവന്നൂര് സഹകരണ ബാങ്ക് തട്ടിപ്പുമായി ബന്ധപ്പെട്ട് ആദ്യ കുറ്റപത്രം ഇ ഡി ഉടന് സമര്പ്പിക്കും. പി ആര് അരവിന്ദാക്ഷന്, പി സതീഷ്കുമാര്, പി പി കിരണ്, സി കെ ജില്സ് എന്നിവരാണ് ആദ്യ കുറ്റപത്രത്തിലെ പ്രതികള്. ഈ മാസം 31ന് കുറ്റപത്രം സമര്പ്പിക്കാനാണ് എന്ഫോഴ്സ്മെന്റ് ഡയറക്ടറേറ്റ് നീക്കം.
കേസുമായി ബന്ധപ്പെട്ട് എം കെ കണ്ണനെയും എ സി മൊയ്തീയും ഉള്പ്പെടെയുള്ളവരെ ഇഡി വിശദമായി ചോദ്യം ചെയ്തിരുന്നെങ്കിലും ഇവരെ പറ്റി കുറ്റപത്രത്തില് പരാമര്ശമില്ല. എം കെ കണ്ണനെ കൂടുതല് ചോദ്യം ചെയ്ത ശേഷം മാത്രമേ പ്രതിപ്പട്ടികയില് ഉള്പ്പെടുത്തണമോയെന്ന കാര്യം തീരുമാനിക്കുകയുള്ളൂ. അതേസമയം കേസുമായി ബന്ധപ്പെട്ട കള്ളപ്പണം ഇടപാടില് ഇ.ഡി.യുടെ ചോദ്യം ചെയ്യല് ഇന്നും തുടരും. കേസില് പെരിങ്ങണ്ടൂര് ബാങ്ക് പ്രസിഡണ്ട് എം ആര് ഷാജന് ഇന്ന് ഇ ഡിക്ക് മുന്നില് ഹാജരാകും. മൊഴി നല്കാന് ഹാജരാകണമെന്ന് ആവശ്യപ്പെട്ട് ഇ.ഡി നോട്ടീസ് നല്കിയിരുന്നു. തട്ടിപ്പ് കേസില് അറസ്റ്റിലായി റിമാന്ഡില് കഴിയുന്ന പി ആര് അരവിന്ദാക്ഷന്റെയും ജില്സിന്റേയും ജാമ്യാപേക്ഷ കലൂര് പി എം എല് എ കോടതി നാളെ പരിഗണിക്കും. ഇരുവരും കേസിലെ പ്രധാന പ്രതികളാണെന്നും ഇവര്ക്ക് ജാമ്യം അനുവദിക്കരുതെന്നും ഇ.ഡി. കോടതിയെ അറിയിക്കും.
