തിരുവനന്തപുരം - വെള്ളയമ്പലത്ത് ഓടിക്കൊണ്ടിരുന്ന പൊലീസ് വാഹനം കത്തിനശിച്ചു. സംസ്ഥാന സ്പെഷ്യല്‍ ബ്രാഞ്ച് ഡെപ്യൂട്ടി കമാന്‍ഡര്‍ സുജിത്തിന്റെ ഔദ്യോഗിക വാഹനമാണ് വെള്ളയമ്പലം സിഗ്‌നലില്‍ വെച്ച് കത്തിയത്. അപകടം നടക്കുമ്പോള്‍ ഡ്രൈവര്‍ മാത്രമാണ് കാറിലുണ്ടായിരുന്നത്. മ്യൂസിയം ഭാഗത്ത് നിന്ന് സിഗ്‌നനല്‍ കടന്ന് കവടിയാര്‍ ഭാഗത്തേക്ക് തിരിയുന്നിടത്ത് എത്തിയപ്പോഴാണ് കാറിന്റെ മുന്‍ഭാഗത്ത് തീ ഉയര്‍ന്നത്. പിന്നാലെ കാര്‍ നിര്‍ത്തി ഡ്രൈവര്‍ ഓടി രക്ഷപ്പെട്ടു. അധികം വൈകാതെ തീ ആളിക്കത്തുകയും വാഹനം ഏറെക്കുറെ പൂര്‍ണമായും കത്തി നശിക്കുകയും ചെയ്തു. എ സിയുടെ ഗ്യാസ് ലീക്ക് ആയതിനെത്തുടര്‍ന്നാണ് തീപിടിച്ചതെന്നാണ് കരുതുന്നത്. വിവരമറിഞ്ഞ് സ്ഥലത്തെത്തിയ ഫയര്‍ ഫോഴ്സാണ് തീയണച്ചത്.
