ന്യൂദൽഹി- മൂന്ന് പതിറ്റാണ്ടോളമായി ചർച്ചയും മറുചർച്ചയുമായി നീളുന്ന വനിത സംവരണ ബിൽ ഇന്ന് പാർലമെന്റിൽ അവതരിപ്പിച്ചെങ്കിലും ഇത് നടപ്പിലാകാൻ ഇനിയും കാത്തിരിക്കേണ്ടി വരും. നിലവിലുള്ള അവസ്ഥയിൽ ബിൽ നടപ്പിലാകണമെങ്കിൽ 2029 വരെ കാത്തിരിക്കേണ്ടി വരും. ബിൽ നിയമമായതിന് ശേഷമുള്ള മണ്ഡല പുനർനിർണയവും നിയോജക മണ്ഡലങ്ങളുടെ പുനനിർണയത്തിനും ശേഷം മാത്രമേ ബിൽ നടപ്പിലാകൂ.
2027-ൽ നടക്കാൻ സാധ്യതയുള്ള അടുത്ത സെൻസസിന് ശേഷം മാത്രമേ മണ്ഡലങ്ങൾ പുനഃക്രമീകരിക്കുകയുള്ളൂ. സെൻസസ് 2021-ലാണ് അവസാനമായി നടത്താനിരുന്നത്, എന്നാൽ കോവിഡ് കാരണം വൈകുകയായിരുന്നു. ഓരോ ഡീലിമിറ്റേഷനു ശേഷവും സ്ത്രീകൾക്കായി സംവരണം ചെയ്ത സീറ്റുകൾ മാറ്റും.
ലോക്സഭയിലെയും നിയമസഭകളിലെയും മൂന്നിലൊന്ന് സീറ്റുകൾ സ്ത്രീകൾക്കായി സംവരണം ചെയ്യുമെന്നും നേരിട്ടുള്ള തിരഞ്ഞെടുപ്പിലൂടെ നികത്തുമെന്നും ആറ് പേജുള്ള ബില്ലിൽ പറയുന്നു. കൂടാതെ, രാജ്യസഭയിലോ സംസ്ഥാന ലെജിസ്ലേറ്റീവ് കൗൺസിലുകൾക്കോ ക്വാട്ട ബാധകമല്ല. ക്വാട്ടയിൽ മൂന്നിലൊന്ന് സീറ്റുകൾ പട്ടികജാതി-പട്ടികവർഗ വിഭാഗങ്ങൾക്കായിരിക്കും.
നിയമനിർമ്മാണ സഭയ്ക്ക് അത്തരമൊരു വ്യവസ്ഥ നിലവിലില്ലാത്തതിനാൽ, ബില്ലിൽ ഒബിസി (മറ്റ് പിന്നാക്ക വിഭാഗം) സംവരണം ഉൾപ്പെടുന്നില്ല. പതിറ്റാണ്ടുകളായി സമാജ്വാദി പാർട്ടി, രാഷ്ട്രീയ ജനതാദൾ (ആർജെഡി) തുടങ്ങിയ പാർട്ടികൾ വനിതാ ക്വാട്ട ബില്ലിനെ എതിർത്തിരുന്നു.
2010ൽ മൻമോഹൻ സിങ്ങിന്റെ നേതൃത്വത്തിലുള്ള കോൺഗ്രസ് സർക്കാർ അധികാരത്തിലിരുന്നപ്പോൾ തയ്യാറാക്കിയ വനിതാ സംവരണ ബില്ലിന് സമാനമാണ് ഇന്ന് അവതരിപ്പിച്ച ബില്ലും. ആംഗ്ലോ ഇന്ത്യൻ കമ്മ്യൂണിറ്റിക്ക് ക്വാട്ട കൊണ്ടുവരുന്നതിനുള്ള രണ്ട് ഭേദഗതികൾ മാത്രമാണ് പുതിയ പതിപ്പിൽ ഒഴിവാക്കിയത്.
'ഭരണഘടന (നൂറ്റി ഇരുപത്തിയെട്ടാം ഭേദഗതി) നിയമം 2023 ആരംഭിച്ചതിന് ശേഷം എടുത്ത ആദ്യത്തെ സെൻസസിന്റെ പ്രസക്തമായ കണക്കുകൾ പ്രസിദ്ധീകരിച്ചതിന് ശേഷം നിയോജക മണ്ഡലങ്ങളുടെ ഡീലിമിറ്റേഷനോ പുനർനിർണയമോ നടത്തിയതിന് ശേഷം വനിതാ ക്വാട്ട ബില്ലിലെ വ്യവസ്ഥകൾ പ്രാബല്യത്തിൽ വരും-ബിൽ പറയുന്നു. ഡീലിമിറ്റേഷൻ നിയമത്തിന് പ്രത്യേക ബില്ലും വിജ്ഞാപനവും ആവശ്യമാണ്.
