റിയാദ്- പെരിന്തൽമണ്ണയിൽ നിർമാണത്തിലിരിക്കുന്ന സി.എച്ച് സെന്ററിന് റിയാദ് കെ.എം.സി.സി പെരിന്തൽമണ്ണ നിയോജക മണ്ഡലം കമ്മിറ്റി സ്വരൂപിച്ച അഞ്ചര ലക്ഷം രൂപ പാണക്കാട് നടന്ന ചടങ്ങിൽ സെന്ററിന്റെ മുഖ്യരക്ഷാധികാരിയായ സയ്യിദ് സാദിഖലി ശിഹാബ് തങ്ങൾക്ക് കൈമാറി.
പെരിന്തൽമണ്ണ ജില്ലാ ആശുപത്രിക്ക് സമീപമാണ് ആധുനിക സൗകര്യങ്ങളോട്കൂടി സി.എച്ച് സെന്ററിന്റെ നിർമാണം പുരോഗമിക്കുന്നത്. നൂറുകണക്കിന് പാവപ്പെട്ട രോഗികൾ നിത്യേന ചികിത്സ തേടിയെത്തുന്ന പെരിന്തൽമണ്ണയിൽ സി.എച്ച് സെന്ററിന്റെ സേവനം വലിയ ആശ്വാസമാണ്. ഡയാലിസിസ് യൂണിറ്റ്, സൗജന്യ മരുന്ന്, ലബോറട്ടറി, ഭക്ഷണം തുടങ്ങി വിവിധ സേവനങ്ങളാണ് പുതിയ കെട്ടിടത്തിൽ ലക്ഷ്യം വെക്കുന്നത്.
ഫണ്ട് കൈമാറ്റ ചടങ്ങിൽ പെരിന്തൽമണ്ണ സി.എച്ച് സെന്റർ ജനറൽ സെക്രട്ടറി എ.കെ മുസ്തഫ, എം.എസ്. അലവി, പെരിന്തൽമണ്ണ മണ്ഡലം മുസ്‌ലിം ലീഗ് പ്രസിഡന്റ് എ.കെ നാസർ മാസ്റ്റർ, റിയാദ് കെ.എം.സി.സി മലപ്പുറം ജില്ലാ വെൽഫെയർ വിംഗ് ചെയർമാൻ റഫീഖ് മഞ്ചേരി, പെരിന്തൽമണ്ണ മണ്ഡലം കെ.എം.സി.സി ഭാരവാഹികളായ സിദ്ദീഖ് താഴെക്കോട്, ഷിഹാബ് മണ്ണാർമ്മല, ഹാരിസ് മൗലവി അമ്മിനിക്കാട്, നാസർ മംഗലത്ത്, ഷാജി അൽപറ്റ, സിദ്ദീഖ് മണ്ണാർമല, ഷാഹുൽ ഹമീദ് മണ്ണാർമ്മല,സാലിഹ് അമ്മിനിക്കാട് തുടങ്ങിയവർ പങ്കെടുത്തു.
