കോഴിക്കോട് - നിപ പരിശോധനക്കായി പൂന വൈറോളജി ലാബിലേക്ക് അയച്ച 11 സാംപിളുകള് കൂടി നെഗറ്റീവ് ആണെന്ന് റിപ്പോര്ട്ട് ലഭിച്ചതായി ആരോഗ്യമന്ത്രി വീണ ജോര്ജ് പറഞ്ഞു. ഹൈ റിസ്കില് പെട്ടവരുടെ ഫലമാണ് പുറത്തുവന്നത്. പുതിയ പോസിറ്റീവ് കേസുകള് ഒന്നും ഇല്ലെന്നും ചികിത്സയിലുള്ള ഒന്പത് വയസ്സുകാരന്റെ നില മെച്ചപ്പെട്ടതായും മന്ത്രി വാര്ത്താ സമ്മേളനത്തില് അറിയിച്ചു. സമ്പര്ക്ക പട്ടികയില് ഉള്പ്പെട്ടവരെ കണ്ടെത്താനുള്ള ശ്രമം തുടരുകയാണ്. ആദ്യം മരിച്ച വ്യക്തി പോയ സ്ഥലങ്ങള് കണ്ടെത്താന് പോലീസ് സഹായത്തോടെ ശ്രമം നടക്കുന്നുണ്ട്. മരുതോങ്കര സ്വദേശിക്ക് രോഗ ലക്ഷണം ഉണ്ടായ ദിവസത്തിന് മുമ്പുള്ള ദിവസങ്ങളില് അയാള് പോയ സ്ഥലങ്ങള് കൂടി കണ്ടെത്താനുള്ള നീക്കം നടക്കുന്നുണ്ടെന്നും മന്ത്രി പറഞ്ഞു.
