തിരുവനന്തപുരം - സംസ്ഥാനത്ത് നിപ പ്രതിരോധത്തിനുള്ള മോണോക്ലോണ് ആന്റിബോഡി എത്തിയതായി ആരോഗ്യ മന്ത്രി വീണ ജോര്ജ് അറിയിച്ചു. നിപ ബാധിച്ച് കഴിഞ്ഞ മാസം 30 ന് മരണപ്പെട്ട വ്യക്തിയുടെ സമ്പര്ക്കത്തിലുള്ള എല്ലാവരുടെയും പരിശോധന ഉറപ്പാക്കുമെന്നും പറഞ്ഞു. നിപ പോസിറ്റീവ് കേസുകള് റിപ്പോര്ട്ട് ചെയ്ത ആശുപത്രികളില് പ്രത്യേക മെഡിക്കല് ബോര്ഡ് രൂപീകരിക്കുമെന്നും മന്ത്രി അറിയിച്ചു. നിപ പരിശോധനയ്ക്ക് കൂടുതല് സംവിധാനങ്ങള് കൊണ്ടുവരും. രാജീവ് ഗാന്ധി ബയോടെക്നോളജി സജ്ജീകരിച്ച മൊബൈല് വൈറോളജി ലാബ് നേരെ കോഴിക്കോട്ടേക്ക് കൊണ്ടുവരുന്നുണ്ട്. ബി എസ് എല് ലെവല് 2 ലാബുകളാണ് കോഴിക്കോട്ടേക്ക് എത്തിക്കുന്നത്. നിപയുമായി ബന്ധപ്പെട്ട് കേന്ദ്ര എക്സ്പേര്ട്ട് കമ്മിറ്റിയുമായി ചര്ച്ച നടത്തുകയാണെന്നും മന്ത്രി അറിയിച്ചു.
