ന്യൂദല്ഹി - മാധ്യമങ്ങള്ക്ക് കുറ്റകൃത്യങ്ങള് റിപ്പോര്ട്ട് ചെയ്യുന്നതിന് മാര്ഗനിര്ദേശം വേണമെന്ന് സുപ്രീം കോടതി. ഇക്കാര്യത്തില് കേന്ദ്ര സര്ക്കാര് മൂന്ന് മാസത്തിനകം മാര്ഗനിര്ദേശം തയാറാക്കണമെന്നും സുപ്രീംകോടതി നിര്ദ്ദേശം നല്കി. അച്ചടി - ദൃശ്യ - സാമൂഹിക മാധ്യമങ്ങള്ക്കെല്ലാം ഇക്കാര്യത്തില് കൃത്യമായ മാര്ഗനിര്ദേശം ഉണ്ടാകണമെന്ന് സുപ്രീം കോടതി വ്യക്തമാക്കി. സംസ്ഥാന ഡി ജി പിമാരും ദേശീയ മനുഷ്യവകാശ കമ്മീഷനും മറ്റുകക്ഷികളും ഇക്കാര്യത്തില് നിര്ദേശങ്ങള് നല്കണം. ഒരു മാസത്തിനകം ഇവര് കേന്ദ്ര ആഭ്യന്തര മന്ത്രാലയത്തിന് നിര്ദേശങ്ങള് നല്കണമെന്നും സുപ്രീം കോടതി ആവശ്യപ്പെട്ടു. ഈ നിര്ദ്ദേശങ്ങള് കൂടി സ്വീകരിച്ചാകണം മാര്ഗനിര്ദേശം തയ്യാറേക്കണ്ടതെന്നും കോടതി വ്യക്തമാക്കി. കുറ്റകൃത്യ അന്വേഷണത്തിലും റിപ്പോര്ട്ടിംഗിലും മാധ്യമങ്ങളോട് സംസാരിക്കാന് നോഡല് ഓഫീസര്മാരെ നിയോഗിക്കണമെന്നും സുപ്രീം കോടതി വ്യക്തമാക്കി. ക്രൈം റിപ്പോര്ട്ടിങ്ങില് പ്രതികളുടെയും ഇരകളുടെയും ബന്ധുക്കളുടെയും അവകാശങ്ങള് സംരക്ഷിക്കണമെന്നും ചീഫ് ജസ്റ്റീസ് അധ്യക്ഷനായ ബെഞ്ച് ഉത്തരവിട്ടു. പൊലീസ് വെളിപ്പെടുത്തല് മാധ്യമ വിചാരണയില് കലാശിക്കരുതെന്നും കോടതി ചൂണ്ടികാട്ടി.
