റാബത്ത്- മൊറോക്കോയിലുണ്ടായ ഭൂചലനത്തില്‍ മരിച്ചവരുടെ എണ്ണം 800 ആയി. പരുക്കേറ്റവര്‍ 329 എന്നാണ് കണ്ടെത്തിയിരിക്കുന്നത്. പ്രാദേശിക സമയം രാത്രി 11 മണിക്കുണ്ടായ ഭൂകമ്പത്തിന്റെ തീവ്രത 6.8 ആണ് രേഖപ്പെടുത്തിയിരിക്കുന്നത്.
രക്ഷാപ്രവര്‍ത്തനം പുരോഗമിക്കുന്നുണ്ടെങ്കിലും മരിച്ചവരുടേയും പരിക്കേറ്റവരുടേയും എണ്ണം ഇനിയും വര്‍ധിക്കുമെന്നാണ് വിലയിരുത്തുന്നത്.
റാബത്തില്‍ നിന്ന് 300 കിലോമീറ്റര്‍ അകലെയുള്ള മറാകേഷ് വരെയുള്ള പ്രദേശങ്ങളെയാണ് ഭൂചലനം ബാധിച്ചത്. മറാറകേഷിന്റെ സമീപ പ്രദേശമാണ് ഭൂചലനത്തിന്റെ പ്രഭവ കേന്ദ്രം. ഭൂചലനത്തില്‍ തകര്‍ന്ന കെട്ടിടങ്ങള്‍ക്കടിയില്‍ നിരവധി പേര്‍ കുടുങ്ങിക്കിടക്കുന്നതായാണ് റിപ്പോര്‍ട്ട്.
ഭൂചലനത്തില്‍ ചരിത്ര പ്രാധാന്യമുള്ള കെട്ടിടങ്ങള്‍ക്ക് തകരാര്‍ സംഭവിച്ചിട്ടുണ്ട്. മറാകേഷ് പഴയ നഗരത്തെ ചുറ്റിയുള്ള പ്രസിദ്ധമായ ചുവപ്പ് മതിലിനും തകരാറുകള്‍ സംഭവിച്ചു.
