ന്യൂയോര്‍ക്ക്- ഗൂഗിളിലെ 22 കാരനായ സോഫ്റ്റ്‌വെയര്‍ എഞ്ചിനീയറായ എഥാന്‍ എന്‍ഗൂണ്‍ലിയുടെ ലക്ഷ്യം 35 വയസ്സിനുള്ളില്‍ അഞ്ച് മില്യണ്‍ ഡോളര്‍ (ഏകദേശം 41 കോടി രൂപ) സമ്പാദിക്കുകയാണ്. അതിന് ശേഷം റിട്ടയര്‍മെന്റ്. ഈ ലക്ഷ്യം നേടാന്‍ സവിശേഷമായ നിക്ഷേപ പദ്ധതികള്‍ക്കാണ് അദ്ദേഹം രൂപം നല്‍കിയത്.
നിക്ഷേപത്തിന്റെ പ്രാധാന്യത്തില്‍ മാതാപിതാക്കളാണ് അദ്ദേഹത്തെ സ്വാധീനിച്ചത്. എന്‍ഗൂണ്‍ലിയുടെ സാമ്പത്തിക ഭദ്രതയിലേക്കുള്ള യാത്ര ജീവിതത്തിന്റെ തുടക്കത്തില്‍ തന്നെ ആരംഭിച്ചു.
ഒരു തീരദേശ ഭവനത്തില്‍ വളര്‍ന്ന എന്‍ഗൂണ്‍ലിയെ, ഒരു സേവിംഗ്‌സ് അക്കൗണ്ടില്‍ പണം സംഭരിക്കുന്നതിനേക്കാള്‍ നിക്ഷേപത്തിന്റെ പ്രാധാന്യം എത്രയാണെന്ന് പഠിപ്പിച്ചത് മാതാപിതാക്കള്‍ തന്നെ. സേവിംഗ്‌സ് അക്കൗണ്ടില്‍ പണമിട്ടാല്‍ കാലക്രമേണ മൂല്യം കുറയുന്നതിന് കാരണമാകും. ഈ ആദ്യകാല സാമ്പത്തിക വിദ്യാഭ്യാസം അദ്ദേഹത്തിന്റെ സാമ്പത്തിക കാഴ്ചപ്പാട് രൂപപ്പെടുത്തുന്നതില്‍ നിര്‍ണായക പങ്ക് വഹിച്ചു.
വിദ്യാഭ്യാസ ലോണ്‍ എടുക്കാതെയാണ് ബെര്‍ക്ക്‌ലിയിലെ കാലിഫോര്‍ണിയ സര്‍വകലാശാലയില്‍ കംപ്യൂട്ടര്‍ സയന്‍സ് ബിരുദം പൂര്‍ത്തിയാക്കിയത്. മുഴുവന്‍ സമയ തൊഴില്‍ നിലനിര്‍ത്തിക്കൊണ്ടുതന്നെ അദ്ദേഹം ഇന്‍ഫര്‍മേഷന്‍ ആന്റ് ഡാറ്റാ സയന്‍സില്‍ ബിരുദാനന്തര ബിരുദം നേടി.
2021 ഡിസംബറില്‍ ടെക് ഭീമനില്‍ സോഫ്റ്റ്‌വെയര്‍ എഞ്ചിനീയറായി സ്ഥാനം നേടിയതോടെ ഗൂഗിളില്‍ ജോലി ചെയ്യാനുള്ള അദ്ദേഹത്തിന്റെ ആഗ്രഹം യാഥാര്‍ഥ്യമായി. ബോണസും സ്‌റ്റോക്ക് യൂണിറ്റുകളും ഉള്‍പ്പെടെ ഏകദേശം 194,000 ഡോളര്‍ (ഏകദേശം 1.60 കോടി രൂപ) ആണ് അദ്ദേഹത്തിന് വാര്‍ഷിക വരുമാനം.
നേരത്തെയുള്ള വിരമിക്കലിന് വേണ്ടിയുള്ള ശ്രമത്തില്‍, വിവിധ റിട്ടയര്‍മെന്റ് അക്കൗണ്ടുകളിലും നിക്ഷേപ അക്കൗണ്ടുകളിലുമായി ഏകദേശം 135,000 ഡോളര്‍ (ഏകദേശം 1.11 കോടി രൂപ) എന്‍ഗുണ്‍ലി ഉത്സാഹപൂര്‍വം നിക്ഷേപം നടത്തി. തന്റെ റിയല്‍ എസ്‌റ്റേറ്റ് സമ്പാദ്യം കൂടുതല്‍ വിപുലീകരിക്കാനുള്ള ഉദ്ദേശ്യത്തോടെ ഫ്‌ളോറിഡയിലും കാലിഫോര്‍ണിയയിലും സ്വത്തുക്കള്‍ സമ്പാദിച്ചുകൊണ്ട് അദ്ദേഹം റിയല്‍ എസ്‌റ്റേറ്റ് വിപണിയിലേക്കും പ്രവേശിച്ചു.
ബാച്ചിലേഴ്‌സ് ബിരുദം പൂര്‍ത്തിയാക്കിയതിന് ശേഷം ആദ്യ രണ്ട് വര്‍ഷം കുടുംബാംഗങ്ങള്‍ക്കൊപ്പം താമസിക്കുന്നതിനിടെ, അച്ചടക്കത്തോടെയുള്ള സാമ്പത്തിക വ്യവസ്ഥകള്‍ അദ്ദേഹം പാലിച്ചു. 60,000 ഡോളര്‍ സമ്പാദ്യമായി സമാഹരിക്കുന്നതിന് ഇത് അദ്ദേഹത്തെ പ്രാപ്തരാക്കി. ഈ സാമ്പത്തിക അച്ചടക്കം ഫ്‌ളോറിഡയിലെ റിവര്‍വ്യൂവില്‍ തന്റെ ആദ്യ നിക്ഷേപ സ്വത്ത് ഏറ്റെടുക്കാന്‍ സഹായിച്ചു.
