ന്യൂദൽഹി-അർണോൾഡ് ഷ്വാസ്‌നെഗർ നായകനായ ടെർമിനേറ്റർ എന്ന സിനിമയിലെ കഥാപാത്രവുമായി പ്രധാനമന്ത്രി നരേന്ദ്രമോഡിയെ ചിത്രീകരിച്ച് ബി.ജെ.പിയുടെ പോസ്റ്റർ. 2024 തെരഞ്ഞെടുപ്പിലും വിജയിച്ചുവരും എന്ന അടിക്കുറിപ്പോടെ ബി.ജെ.പി തന്നെയാണ് ചിത്രം ട്വീറ്റ് ചെയ്തത്. രാജ്യത്തെ പുതിയ പ്രതിപക്ഷ മുന്നണിയായ ഇന്ത്യ യുടെ ദ്വിദിന യോഗം മുംബൈയിൽ നടക്കാനിരിക്കെയാണ് ബി.ജെ.പി മോഡിയെ ടെർമിനേറ്ററാക്കിയത്.
'പ്രധാനമന്ത്രി മോഡിയെ പരാജയപ്പെടുത്താൻ കഴിയുമെന്ന് പ്രതിപക്ഷം കരുതുന്നു. സ്വപ്നം കാണുക. ടെർമിനേറ്റർ എപ്പോഴും വിജയിക്കും എന്ന അടിക്കുറിപ്പും ചിത്രത്തിലുണ്ട്.
ഇന്ത്യ മുന്നണിയുടെ യോഗം നാളെയും മറ്റന്നാളും മുംബൈയിൽ ചേരുന്നുണ്ട്. 26 കക്ഷികൾ യോഗത്തിൽ പങ്കെടുക്കും.
ബിജെപിയുടെ നേതൃത്വത്തിലുള്ള മഹാരാഷ്ട്ര സർക്കാർ സംസ്ഥാനത്തെ 48 ലോക്‌സഭാ സീറ്റുകളിലും രണ്ട് ദിവസത്തെ അവലോകന യോഗവും പ്രഖ്യാപിച്ചു.
വരാനിരിക്കുന്ന ലോക്‌സഭാ തിരഞ്ഞെടുപ്പിനെക്കുറിച്ചുള്ള ചർച്ചകൾ ആദ്യം മുഖ്യമന്ത്രി ഏക്‌നാഥ് ഷിൻഡെയുടെ മുംബൈയിലെ ഔദ്യോഗിക വസതിയിൽ നടക്കും. ഉപമുഖ്യമന്ത്രിമാരായ ദേവേന്ദ്ര ഫഡ്‌നാവിസ്, അജിത് പവാർ എന്നിവരും മറ്റ് മുതിർന്ന നേതാക്കളും യോഗത്തിൽ പങ്കെടുക്കും.
Opposition thinks PM Modi can be defeated. Dream on! The Terminator always wins. pic.twitter.com/IY3fYWMzbL
— BJP (@BJP4India) August 30, 2023
