ഹൈദരാബാദ്- ഹൈദരാബാദിൽ ഭാര്യയുമായുള്ള തർക്കത്തിനു പിന്നാലെ എട്ടുവയസ്സായ മകളെ കൊലപ്പെടുത്തി. കുണ്ടേതി ചന്ദ്രശേഖർ (40) എന്ന പ്രതിയെ തെലങ്കാന പോലീസ് അറസ്റ്റ് ചെയ്തു. ബേബി മോക്ഷജയെയാണ് ക്രൂരമായി കൊലപ്പെടുത്തിയതെന്ന് പോലീസ് പറഞ്ഞു.ശേഖറിന്റെ ഭാര്യ തന്നേക്കാൾ കൂടുതൽ ശമ്പളം വാങ്ങാൻ തുടങ്ങിയതോടെയാണ് ഇരുവരും തമ്മിൽ തർക്കം ആരംഭിച്ചതെന്ന് പോലീസ് പറയുന്നു.
രക്തം പുരണ്ട വസ്ത്രങ്ങളുമായി ഒരാൾ കാറിലിരിക്കുന്നുവെന്ന വിവരമാണ് പോലീസിനു ലഭിച്ചത്. ഹൈദരാബാദിലെ കൊഹേഡ എക്സ് റോഡിന് സമീപം പോലീസ് എത്തിയപ്പോൾ വാഹനത്തിന്റെ ഡ്രൈവർ സീറ്റിൽ ഒരാൾ ഇരിക്കുന്നതും പിൻസീറ്റിൽ മരിച്ച പെൺകുട്ടിയുടെ മൃതദേഹവും കണ്ടെത്തി. മരിച്ച പെൺകുട്ടിയുടെ തൊണ്ടയിൽ സാരമായ മുറിവുണ്ടെന്ന് പോലീസ് പറഞ്ഞു.
2011 ലാണ് ശേഖർ സോഫ്‌റ്റ്‌വെയർ ജീവനക്കാരിയായ ഹിമബിന്ദുവിനെ വിവാഹം കഴിച്ചത്. എന്നാൽ പ്രതി ജൂനിയർ ജീവനക്കാരനായാണ് ജോലി ചെയ്യുന്നതെന്നും ഭാര്യയേക്കാൾ കുറഞ്ഞ ശമ്പളമാണ് വാങ്ങുന്നതെന്നും. ഇതേച്ചൊല്ലി ഇരുവരും വഴക്കിടാറുണ്ടായിരുന്നുവെന്ന് പ്രതി സമ്മതിച്ചതായി പോലീസ് പറഞ്ഞു.ഹൈദരാബാദ്, ബാംഗ്ലൂർ, യുഎസ്എ എന്നിവിടങ്ങളിലെ വിവിധ കമ്പനികളിലും ഇവർ ജോലി ചെയ്തിട്ടുണ്ടെന്ന് പോലീസ് പറഞ്ഞു.
ഒരാഴ്ച മുമ്പ് ചന്ദനഗറിലെ ഒരു കടയിൽ നിന്ന് മൂർച്ചയുള്ള പെൻസിൽ കട്ടർ കത്തി വാങ്ങി കാറിൽ സൂക്ഷിച്ച് പ്രതി മകളെ കൊല്ലാനുള്ള അവസരത്തിനായി കാത്തിരിക്കുകയായിരുന്നുവെന്ന് പോലീസ് പറഞ്ഞു. മൃതദേഹം ഹൈദരാബാദിന്റെ പ്രാന്തപ്രദേശത്ത് ഉപേക്ഷിക്കാൻ പ്രതി കാറിൽ ഔട്ടർ റിംഗ് റോഡ് വഴി വിജയവാഡയിലേക്ക് പോകുകയായിരുന്നു. വഴിയിൽ കൊഹെഡ എക്സ് റോഡിന് സമീപം എത്തിയപ്പോൾ ഡിവൈഡറിൽ തട്ടി കാറിന്റെ മുൻ വലത് ടയർ പൊട്ടിയതിനെ തുടർന്ന് നിർത്തി. കാറിനുള്ളിൽ മൃതദേഹം കണ്ടതിനെ തുടർന്ന് ഒരാൾ പോലീസിൽ അറിയിക്കുകയുമായിരുന്നു.
