ബംഗളൂരു- മുപ്പത്തെട്ടുകാരിയെ കൂട്ടബലാത്സംഗം ചെയ്ത് കൊലപ്പെടുത്തിയ കേസില് മൂന്നു പേരെ കര്ണാടക പോലീസ് അറസ്റ്റ് ചെയ്തു. ബംഗളൂരുവിലെ ജിഗാനി പോലീസ് സ്റ്റേഷന് പരിധിയിലായിരുന്നു സംഭവം. ബന്നാര്ഗട്ട ടൗണിനു സമീപമുള്ള ഹക്കിപിക്കി കോളനിയോടു ചേര്ന്ന് താമസിക്കുന്ന മുപ്പത്തെട്ടുകാരിയാണ് പീഡനത്തിന് ഇരയായത്. ഇവരെ കുറ്റിക്കാട്ടിലേക്കു ബലമായി പിടിച്ചുകൊണ്ടുപോയി കൂട്ടബലാത്സംഗം ചെയ്യുകയും പിന്നീട് കൊലപ്പെടുത്തുകയുമായിരുന്നു. യുവതി തിരിച്ചെത്താത്തതിനെ തുടര്ന്ന് വീട്ടുകാര് പോലീസിനെ സമീപിച്ചു. തുടര്ന്നു നടത്തിയ അന്വേഷണത്തിലാണ് മൃതദേഹം കണ്ടെത്തിയത്.
യുവതിക്കായി തിരച്ചില് നടത്താന് സഹായിച്ച മൂന്നു പേരാണ് അറസ്റ്റിലായതെന്നു പോലീസ് വ്യക്തമാക്കി. ഇവരിലൊരാള് ഇതുമായി ബന്ധപ്പെട്ട് ഒരു വാര്ത്താ ചാനലിനോട് സംസാരിക്കുകയും സംഭവത്തില് ആശങ്ക രേഖപ്പെടുത്തുകയും ചെയ്തിരുന്നു. യുവതിയെ കണ്ടെത്തുന്നതിനായി താനും സുഹൃത്തുക്കളും ചേര്ന്ന് തിരച്ചില് നടത്തിയതായും അയാള് അവകാശപ്പെട്ടു. മറ്റൊരു പ്രതിയാണ് കുറ്റിക്കാട്ടില്നിന്നു യുവതിയുടെ മൃതദേഹം പുറത്തെടുത്തത്. ഇതിനു ശേഷമാണ് മൃതദേഹം പോലീസ് തിരിച്ചറിഞ്ഞത്.
