ന്യൂദല്‍ഹി- ടെലിവിഷന്‍ വാര്‍ത്താ ചാനലുകളെയും ഉള്ളടക്കത്തെയും നിയന്ത്രിക്കണമെന്ന് ആവശ്യപ്പെട്ട ഹരജികള്‍ പരിഗണിക്കാതെ സുപ്രിം കോടതി തള്ളി. ഇത്തരം ചാനലുകള്‍ കാണണോ വേണ്ടയോ എന്ന് തെരഞ്ഞെടുക്കാനുള്ള സ്വാതന്ത്ര്യം കാഴ്ചക്കാര്‍ക്ക് ഉണ്ടെന്ന് ജസ്റ്റിസ് അഭയ് ഓക്കയുടെ നേതൃത്വത്തിലുള്ള ഡിവിഷന്‍ ബെഞ്ച് വാക്കാല്‍ അഭിപ്രായപ്പെട്ടു.
എല്ലാ വിഷയങ്ങളും സുപ്രിം കോടതിയില്‍ ഫയല്‍ ചെയ്യുന്ന പ്രവണതയില്‍ അതൃപ്തി പ്രകടിപ്പിച്ച കോടതി എന്തുകൊണ്ടാണ് ഹരജിക്കാര്‍ ഹൈക്കോടതിയെ സമീപിക്കാത്തതെന്നും ആരാഞ്ഞു.
ജഡ്ജിമാരെക്കുറിച്ച് സോഷ്യല്‍ മീഡിയയില്‍ നടത്തിയ പ്രസ്താവനകളുടെ വിഷയവും കോടതി അഭിസംബോധന ചെയ്തു. എന്ത് കാണണമെന്ന് തെരഞ്ഞെടുക്കാനുള്ള അവകാശം പ്രേക്ഷകനുണ്ടെന്നും ഇഷ്ടമില്ലാത്തത് കാണാതിരിക്കാനുള്ള അവസമുണ്ടെന്നും കോടതി പറഞ്ഞു. മാധ്യമ ബിസിനസുകള്‍ക്കെതിരായ ഉയരുന്ന പരാതികള്‍ വേഗത്തില്‍ തീര്‍പ്പാക്കാന്‍ ഒരു സ്വതന്ത്ര മീഡിയ ട്രൈബ്യൂണല്‍ സ്ഥാപിക്കണമെന്ന് ആവശ്യപ്പെട്ടുള്ള ഹരജികള്‍ പരിഗണിക്കാനും സുപ്രിം കോടതി വിസമ്മതിച്ചു.
ബ്രോഡ്കാസ്റ്റര്‍മാരുടെയും ഇലക്ട്രോണിക് മാധ്യമങ്ങളുടെയും സംസാര സ്വാതന്ത്ര്യം നിയന്ത്രിക്കുന്നതിനുള്ള മാര്‍ഗ്ഗനിര്‍ദ്ദേശങ്ങള്‍ രൂപീകരിക്കണമെന്നും നിര്‍ണായക വിഷയങ്ങളില്‍ ടി. വി ചാനലുകള്‍ നടത്തുന്ന സെന്‍സേഷണല്‍ റിപ്പോര്‍ട്ടിംഗ് തടയാന്‍ വാര്‍ത്താ പ്രക്ഷേപകര്‍ക്ക് സ്വതന്ത്ര റെഗുലേറ്ററി അതോറിറ്റി രൂപീകരിക്കണമെന്നുമാണ് ഹര്‍ജികള്‍ ആവശ്യപ്പെട്ടത്.
