രാജ്യത്ത് സുരക്ഷിതമായും വേഗത്തിലും നീതി ഉറപ്പാക്കുന്നതിൽ ആർട്ടിഫിഷ്യൽ ഇന്റലിജൻസ് (എ.ഐ) പ്രയോജനപ്പെടുത്തുന്നത് ചർച്ച ചെയ്യുന്നതിനായി നിയമ, സാങ്കേതികവിദ്യ മേഖലകളിലെ വിദഗ്ധർ കൈകോർക്കുന്നു. നിയമ നീതി മേഖലയിലെ വെല്ലുവിളികളെ എ.ഐ സാങ്കേതിക വിദ്യയുടെ സഹായത്തോടെ പരിഹരിക്കുക എന്ന ലക്ഷ്യത്തോടെ അഭിഭാഷകരുടെയും സാങ്കേതിക വിദഗ്ധരുടെയും സംയുക്ത സംഘടനയായ ഓപൺ എൻ.വൈ.എ.ഐ ടിങ്കർ ഹബ്ബുമായി സഹകരിച്ചാണ് ജൂലൈ 28 മുതൽ അഞ്ച് ദിവസത്തെ മേക്കർ റെസിഡൻസി കൊച്ചിയിൽ സംഘടിപ്പിക്കുന്നത്.
കളമശ്ശേരിയിലെ ടിങ്കർ ഹബിലാണ് പരിപാടി നടക്കുന്നത്. ഓഗസ്റ്റ് ഒന്നിന് പരിപാടി സമാപിക്കും. ജൂലൈ 30 തിങ്കളാഴ്ച രാവിലെ പത്ത് മുതൽ നാല് വരെ പൊതുജനങ്ങൾക്ക് സൗജന്യമായി പരിപാടിയിൽ പങ്കെടുക്കാം. മികച്ച ആശയങ്ങളും പ്രോജക്ടുകളും ലോകോത്തരമായ സദസ്സിനു മുന്നിൽ അവതരിപ്പിക്കാനുള്ള അവസരവുമുണ്ടാകും.
ഇന്ത്യ, യുകെ, നെതർലാൻഡ്സ് എന്നിവിടങ്ങളിൽ നിന്നുള്ള നിയമ, സാങ്കേതികവിദ്യ, ഡിസൈൻ, സാമൂഹിക സംരംഭകത്വ മേഖലകളിലെ വിദഗ്ധരും സംരംഭകരും മേക്കർ റെസിഡൻസിയിൽ പങ്കെടുക്കും. എ.ഐയുടെ ഫലപ്രാപ്തി, എ.ഐയിലെ ധാർമികത, പൊതു സംവിധാനങ്ങളിലെ പരിമിതികളും വെല്ലുവിളികളും തുടങ്ങിയ വിഷയങ്ങളിൽ നിയമ, സാങ്കേതിക വിദഗ്ധർ ചർച്ചകൾ നയിക്കും. മേക്കർ റെസിഡൻസിയിൽ പങ്കെടുക്കുന്നവരുടെ ആശയങ്ങളും മാർഗനിർദേശങ്ങളും വിദഗ്ധർ വിലയിരുത്തും.
എ.ഐ, നിയമം, നിയമ സാങ്കേതികവിദ്യ, ഡിസൈൻ, സോഷ്യൽ എന്റർപ്രണർഷിപ്പ് എന്നിവയിൽ വിദഗ്ധ സെഷനുകൾ റെസിഡൻസിയിൽ നടക്കും. ഉത്തരവാദിത്തമുള്ള എ.ഐ വികസനം, യു.ഐ/യു.എക്സ് ഡിസൈൻ, ഫൈൻട്യൂണിംഗ് എ.ഐ മോഡലുകൾ, സ്‌കേലബിലിറ്റി മനസ്സിലാക്കൽ, ഇന്ത്യൻ ഭാഷകളിലൂടെ പ്രവേശനം സാധ്യമാക്കുന്നതിനുള്ള വെല്ലുവിളികൾ എന്നിവ ഉൾപ്പെടെയുള്ള വിഷയങ്ങൾ ഈ സെഷനുകളിൽ ചർച്ച ചെയ്യും.
എ.ഐ4ഭാരത്, ഇലക്ട്രോണിക്സ് ആൻഡ് ഐ.ടി മന്ത്രാലയത്തിന്റെ ഭാഷിണി എന്നിവയുടെ പങ്കാളിത്തത്തോടെയുള്ള ഓപൺ എൻവൈഎഐയുടെ പദ്ധതി ഇന്ത്യൻ ഭാഷകളിൽ വിവരങ്ങളും സേവനങ്ങളും പ്രചരിപ്പിക്കുന്നതിനുള്ള ചാറ്റ്ജിപിടിയുടെ മികച്ച സംരംഭങ്ങളിലൊന്നാണെന്ന് മൈക്രോസോഫ്റ്റ് സി.ഇ.ഒ സത്യ നാദെല്ലയും ഓപൺ എ.ഐ സി.ഇ.ഒ സാം ആൾട്ട്മാനും ചൂണ്ടിക്കാട്ടി.
ജെ.പി മോർഗൻ എ.ഐ ഡയറക്ടർ ദീപക് പരമാനന്ദ്, മൈക്രോസോഫ്റ്റ് റിസർച്ചിലെ എസ്.ഡി.ഇ സീനിയർ റിസർച്ച് സമീർ സെഗൽ, സീറോധ സി.ടി.ഒ കൈലാഷ് നാഥ്, ട്രൈലീഗൽ പാർട്ണർമാരായ രാഹുൽ മാത്തൻ, നിഖിൽ നരേന്ദ്രൻ, ഉഡാൻ സിടിഒ അമോദ് മാളവ്യ, അശോക സീനിയർ ചേഞ്ച് ലീഡർ ഹനേ ബറൂച്ചൽ, ആസ്പയർ പ്രോജക്ട് ഡയറക്ടർ ഗോപാൽ ഗാർഗ് എന്നിവർ റെസിഡൻസിയിലെ ചില ശ്രദ്ധേയ ഉപദേഷ്ടാക്കളാണ്.
പഞ്ചാബ്, ഹരിയാന, മദ്രാസ് ഹൈക്കോടതികളിലെ മുൻ ജഡ്ജി ജസ്റ്റിസ് കണ്ണൻ കൃഷ്ണമൂർത്തി, ആന്ധ്രാപ്രദേശ് സർക്കാർ പ്രതിനിധി ധാത്രി റെഡ്ഡി, ആന്ധ്രാപ്രദേശ് പോലീസ് പ്രതിനിധി കിഷോർ കോമ്മി, വൺ ഫ്യൂച്ചർ കലക്ടീവ്, ലോക്റ്റോപസ്, ഇൻഷുറൻസ് സമാധാൻ, യൂത്ത് കി ആവാസ്, സിറ്റിസൺ ഡിജിറ്റൽ ഫൗണ്ടേഷൻ തുടങ്ങിയ പ്രമുഖ വ്യക്തികളും സംഘടനകളും പരിപാടിയുടെ ഭാഗമാകും. കൂടുതൽ വിവരങ്ങൾ www.makerpsace.opennyai.org യിൽ ലഭ്യമാണ്.
