പാലക്കാട്- മഴയില്‍ സ്‌കൂളിന്റെ മേല്‍ക്കൂര തകര്‍ന്ന് വിദ്യാര്‍ഥിക്കും അധ്യാപികയ്ക്കും പരിക്ക്. ഓടിട്ട മേല്‍ക്കൂരയാണ് തകര്‍ന്നുവീണത്.
ഒറ്റപ്പാലം പനവണ്ണയില്‍ ദേശബന്ധു സ്‌കൂളിന്റെ മേല്‍ക്കൂരയാണ് തകര്‍ന്നത്. വിദ്യാര്‍ഥി ആദര്‍ശ്, അധ്യാപിക ശ്രീജ എന്നിവര്‍ക്കാണ് പരിക്കേറ്റത്. വിദ്യാര്‍ഥിയേയും അധ്യാപികയേയും ഉടന്‍ ഒറ്റപ്പാലത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ഇരുവരുടെയും പരിക്ക് സാരമല്ലെന്ന് ആശുപത്രി അധികൃതര്‍ അറിയിച്ചു.
ഉച്ചക്ക് ഭക്ഷണത്തിന് ക്ലാസ് വിട്ട സമയമായതിനാല്‍ കുട്ടികള്‍ ഇല്ലാതിരുന്നത് വന്‍ ദുരന്തമാണ് ഒഴിവായത്. സംഭവത്തില്‍ വിദ്യാഭ്യാസ വകുപ്പ് അന്വേഷണത്തിന് ഉത്തരവിട്ടു. കാലപ്പഴക്കത്തെ തുടര്‍ന്നാണ് മേല്‍ക്കൂര തകര്‍ന്നതെന്നാണ് പ്രാഥമിക നിഗമനം.
