ന്യൂഡൽഹി - തെലങ്കാനയിൽ യാത്രയ്ക്കിടെ ട്രെയിനിന്റെ ബോഗികൾക്ക് തീപിടിച്ചു. ഫലക്‌നൗമ എക്‌സ്പ്രസിന്റെ മൂന്ന് ബോഗികളിലാണ് അഗ്‌നിബാധയുണ്ടായത്. ട്രെയിനിലെ എസ് 4, എസ് 5, എസ് 6 എന്നീ കോച്ചുകൾക്കാണ് തീപിടിച്ചതെന്ന് ദക്ഷിണ റെയിൽവെ സി.പി.ആർ.ഒ സി.എച്ച് രാകേഷ് അറിയിച്ചു.
പശ്ചിമ ബംഗാളിലെ ഹൗറയിൽ നിന്നും സെക്കന്ദരാബാദിലേക്ക് പോകുകയായിരുന്ന ട്രെയിനിലാണ് സംഭവം. ബൊമ്മൈ പള്ളിയ്ക്കും പഗിഡിപ്പള്ളിയ്ക്കുമിടയിൽ ട്രെയിൻ നിർത്തിയ ശേഷം യാത്രക്കാരെയെല്ലാം പുറത്തിറക്കി രക്ഷിച്ചു.
ട്രെയിനിലെ ആദ്യം തീപിടിച്ച ബോഗികളെല്ലാം പൂർണമായി കത്തിനശിച്ചു. തീപിടുത്തമുണ്ടായ ഉടനെ റെയിൽവെ അധികൃതർ സ്ഥലത്തെത്തി വേണ്ട നടപടിയെടുത്തത് ആൾനാശമില്ലാതെയാകാൻ സഹായിച്ചതായി ഉദ്യോഗസ്ഥർ പ്രതികരിച്ചു. അപകട കാരണം വ്യക്തമായിട്ടില്ല. ഷോർട്ട് സർക്യൂട്ടാണെന്നാണ് സംശയമെന്നും ഉദ്യോഗസ്ഥർ പറഞ്ഞു.
