ടിക് ടോക് പോലെ കൂടുതൽ പേരെ ആകർഷിക്കാനുള്ള തന്ത്രം
ഇൻസറ്റഗ്രാമിൽ മറ്റുള്ളവരുടെ റീലുകൾ ഡൗൺലോഡ് ചെയ്യാനും ആപ്പിനു പുറത്ത് ഷെയർ ചെയ്യാനും സൗകര്യമായി. വർഷങ്ങളായി എതിരാളിയായ ടിക് ടോക്കിലുള്ള സൗകര്യമാണ് വളരെ വൈകി ഇൻസ്റ്റഗ്രാം ഏർപ്പെടുത്തിയിരിക്കുന്നത്. ടിക് ടോക്കിനു പുറത്തും അവരുടെ വാട്ടർമാർക്കോടു കൂടിയ ഹ്രസ്വ വീഡിയോ കാണാൻ അവസരമൊരുക്കിയത് പ്രചാരം കൂടാൻ ഏറെ സഹായകമായിരുന്നു.
നിലവിൽ അമേരിക്കയിലുള്ള ഉപയോക്താക്കൾക്ക് ഇൻസ്റ്റഗ്രാം റീലുകൾ തങ്ങളുടെ ക്യാമറ റോളിലേക്ക് ഡൗൺ ലോഡ് ചെയ്യാമെന്നാണ് ഇൻസ്റ്റഗ്രാമിന്റെ ബ്രോഡ്കാസ്റ്റ് ചാനലിൽ വ്യക്തമാക്കിയിരിക്കുന്നത്. താമസിയാതെ മറ്റു രാജ്യങ്ങളിലും ഇത് ലഭ്യമാകും. ഷെയർ ഐക്കണിൽ ടാപ് ചെയ്തു കൊണ്ട് ഉപയോക്താക്കൾക്ക് ഡൗൺലോഡ് ഒപ്ഷൻ തെരഞ്ഞെടുക്കാം. പബ്ലിക് അക്കൗണ്ടുകളിൽനിന്നുള്ള റീലുകൾ മാത്രമേ ഇങ്ങനെ ഡൗൺലോഡ് ചെയ്യാൻ സാധിക്കുകയുള്ളൂവെന്ന് ഇൻസ്റ്റഗ്രാം മേധാവി ആദം മൊസ്സേരി പറഞ്ഞു. ഇങ്ങനെ ഡൗൺലോഡ് ചെയ്യപ്പെടുന്ന റീലുകളിൽ ഇൻസ്റ്റഗ്രാമിന്റെ വാട്ടർമാർക് ഉണ്ടാകുമോയെന്ന് അദ്ദേഹം വ്യക്തമാക്കിയിട്ടില്ല. അദ്ദേഹം പോസ്റ്റ് ചെയ്ത ഫോട്ടോയിൽ ഡൗൺലോഡ് ചെയത് റീലിൽ ഇൻസ്റ്റഗ്രാം ലോഗോയും അക്കൗണ്ടിന്റെ പേരും കാണുന്നുണ്ട്. ഡൗൺലോഡ് ചെയ്യുന്ന വീഡിയോകളിൽ വാട്ടർമാർക്ക് ചേർക്കാൻ ടിക് ടോക് ഇതേ ഫോർമാറ്റാണ് ഉപയോഗിക്കുന്നത്. അതേ
സമയം, ഇൻസ്റ്റഗ്രാം നേരത്തെ തന്നെ സ്വന്തം വീഡിയോകൾ വാട്ടർമാർക്ക് ഇല്ലാതെ തന്നെ ഡൗൺലോഡ് ചെയ്യാൻ ഉപയോക്താക്കളെ അനുവദിക്കുന്നുണ്ട്. റീലുകൾ മറ്റുള്ളവർക്ക് ഡൗൺലോഡ് ചെയ്യാനുള്ള അനുമതിയാണ് ഇപ്പോൾ നൽകിയിരിക്കുന്നത്. ടിക് ടോക്കിന്റേയോ മറ്റേതെങ്കിലുമോ വാട്ടർമാർക്ക് അടങ്ങിയ ഉള്ളടക്കം പ്രൊമോട്ട് ചെയ്യുന്നത് 2021 ൽ ഇൻസ്റ്റഗ്രാം നിർത്തിയിരുന്നു. പ്ലാറ്റ്‌ഫോമുകൾ മാറിയുള്ള ഷെയറിംഗ് ഒഴിവാക്കാൻ യുട്യൂബ് ഷോർട്ടുകളിൽ ലോഗോ ഉൾപ്പെടുത്തുന്ന സംവിധാനം കഴിഞ്ഞ ഓഗസ്റ്റിൽ ആരംഭിച്ചിരുന്നു. സ്വന്തം പ്ലാറ്റ്‌ഫോമിൽ റീലുകൾ കാണാൻ കൂടുതൽ പേർ എത്തുമെന്ന കണക്കുകൂട്ടലിലാണ് ഇൻസ്റ്റഗ്രാം ഇപ്പോൾ ഡൗൺലോഡ് ചെയ്യാനുള്ള സൗകര്യം ഏർപ്പെടുത്തിയിരിക്കുന്നത്. കൂടുതൽ പേരെ ആകർഷിക്കാനുള്ള തന്ത്രമാണിതെന്ന് വിദഗ്ധർ പറയുന്നു.
കഴിഞ്ഞ ഏതാനും പാദ വർഷങ്ങളിൽ മാതൃകമ്പനയായ മെറ്റയുടെ വരുമാനം വർധിപ്പിക്കാൻ റീലുകൾ സഹായകമായിട്ടുണ്ട്. നടപ്പുവർഷം ആദ്യ പാദത്തിൽ ആളുകൾ ഇൻസ്റ്റഗ്രാമിൽ ചെലവഴിക്കുന്ന സമയം 24 ശതമാനം വർധിച്ചുവെന്നാണ് മെറ്റ സി.ഇ.ഒ മാർക്ക് സക്കർബർഗ് പറയുന്നത്. ഇതിന് കൃത്രിമബുദ്ധി അടിസ്ഥാനമാക്കിയുള്ള റീൽസ് റെക്കമെൻഡേഷനുകൾക്ക് അദ്ദേഹം നന്ദി പറയുന്നു.
