ന്യൂദൽഹി-തീവ്ര ചുഴലിക്കാറ്റായ 'ബൈപാർജോയ്' അതിതീവ്ര ചുഴലിക്കാറ്റായി മാറിയെന്ന് കാലാവസ്ഥാ നിരീക്ഷണ കേന്ദ്രം. കൊടുങ്കാറ്റ് 'ദ്രുതഗതിയിലുള്ള തീവ്രത'ക്ക് വിധേയമായിക്കൊണ്ടിരിക്കുകയാണെന്നും കാലാവസ്ഥ നിരീക്ഷണ വകുപ്പ് അറിയിച്ചു.
ബൈപാർജോയ് ചുഴലിക്കാറ്റ് വടക്കോട്ട് നീങ്ങി ജൂൺ 15 ന് പാകിസ്ഥാനിലേക്കും അതിനോട് ചേർന്നുള്ള സൗരാഷ്ട്ര, കച്ച് തീരങ്ങളിലും എത്താൻ സാധ്യതയുണ്ടെന്ന് ഇന്ത്യൻ കാലാവസ്ഥാ വകുപ്പ് (ഐഎംഡി) അറിയിച്ചു. അടുത്ത അഞ്ച് ദിവസങ്ങളിൽ ഗുജറാത്ത് ഇടിമിന്നലിനും കനത്ത മഴക്കും സാക്ഷ്യം വഹിക്കും. കാറ്റിന്റെ വേഗത ഉയർന്ന തോതിൽ തുടരും, പ്രത്യേകിച്ച് സൗരാഷ്ട്ര-കച്ച് മേഖലയിൽ. സൗരാഷ്ട്ര, കച്ച് തീരങ്ങളിൽ ബുധനാഴ്ച വരെ കടൽ പ്രക്ഷുബ്ധമാകും. വ്യാഴാഴ്ച കൂടുതൽ പ്രക്ഷുബ്ധമാകും.
ബൈപാർജോയ് ചുഴലിക്കാറ്റ് കാരണം ശക്തമായ തിരമാലകളും കാറ്റും കാരണം ഗുജറാത്തിലെ വൽസാദിലെ അറബിക്കടൽ തീരത്തെ പ്രശസ്തമായ വിനോദസഞ്ചാര കേന്ദ്രമായ തിതാൽ ബീച്ച് താൽക്കാലികമായി അടച്ചു.
ഗുജറാത്ത്, കേരളം, കർണാടക, ലക്ഷദ്വീപ് തീരങ്ങളിൽ മത്സ്യത്തൊഴിലാളികൾ കടലിൽ പോകരുതെന്ന് ഐഎംഡി നിർദേശിച്ചിട്ടുണ്ട്.
അന്താരാഷ്ട്ര നാവിക നിയമം അനുസരിച്ച്, വരാനിരിക്കുന്ന പ്രതികൂല കാലാവസ്ഥയെക്കുറിച്ച് കപ്പലുകൾക്ക് മുന്നറിയിപ്പ് നൽകുന്നതിന് തുറമുഖങ്ങൾ സിഗ്‌നലുകളുടെ ശേഷി ഉയർത്തും.
