തിരുവനന്തപുരം- പ്രവാസി മലയാളികളുടെ എക്കാലത്തെയും സ്വപ്നമായ യാത്രാ കപ്പല് സര്വ്വീസ് ആരംഭിക്കുവാന് നോര്ക്കയുമായി സഹകരിച്ച് പദ്ധതി ആവിഷ്കരിക്കുമെന്ന് തുറമുഖ മന്ത്രി അഹമ്മദ് ദേവര്കോവില്. തിരുവനന്തപുരത്ത് മലബാര് ഡെവലപ്പ്മെന്റ് കൗണ്സിലും കേരള മാരിടൈം ബോര്ഡും സംയുക്തമായി സംഘടിപ്പിച്ച ഉന്നതതലയോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
വിദേശ രാജ്യങ്ങളില് ജോലി ചെയ്യുന്ന സാധാരണക്കാരായ പ്രവാസികളില്നിന്ന് വിമാന കമ്പനികള് സീസണുകളില് ഭീമമായ തുകയാണ് യാത്രക്കായി ഈടാക്കുന്നത്. തുച്ഛമായ സമ്പാദ്യത്തിന്റെ സിംഹഭാഗവും യാത്രക്കായി മാറ്റിവെക്കേണ്ട ദുരവസ്ഥയാണ് പ്രവാസികള്ക്ക് നിലവിലുള്ളത്. എല്.ഡി.എഫ് സര്ക്കാര് പ്രവാസികളുടെ യാത്രാപ്രശ്നങ്ങള് പരിഹരിക്കുന്നതിന് 15 കോടി രൂപ ഈ വര്ഷത്തെ ബജറ്റില് വകയിരുത്തിയിട്ടുണ്ട്. ഇതു കൂടി ഉപയോഗപ്പെടുത്തി കപ്പല് സര്വ്വീസ് ആരംഭിക്കുവാനാണ് ആലോചനയെന്ന് അഹമ്മദ് ദേവര്കോവില് പറഞ്ഞു.
നിരക്കും യാത്രാ ഷെഡ്യുളും തീരുമാനിച്ചതിന് ശേഷം യാത്രക്കാരെ കണ്ടെത്തുന്നതിനായി നോര്ക്കയുടെയും പ്രവാസി സംഘടനയുടെയും സഹകരണത്തോടെ ഓണ്ലൈന് രജിസ്ട്രേഷന് ആരംഭിക്കുവാനാണ് ഉദ്ദേശിക്കുന്നതെന്നും മന്ത്രി പറഞ്ഞു. ചടങ്ങില് കേരള മാരിടൈം ബോര്ഡ് ചെയര്മാന് എന്.എസ്. പിള്ള, സി.ഇ.ഒ സലീം കുമാര്, എം.ഡി.സി പ്രസിഡന്റ് ഷെവലിയാര് സി.ഇ ചാക്കുണ്ണി, ഭാരവാഹികളായ അഡ്വ. എം.കെ. അയ്യപ്പന്, സുബൈര് തുടങ്ങിയവര് പങ്കെടുത്തു.
