തിരുവനന്തപുരം- അരിയിട്ടു വാഴിക്കലുകളോ ഫോട്ടോ ഷൂട്ടോ അല്ല ജനാധിപത്യമെന്ന് പ്രതിപക്ഷ നേതാവ് വി. ഡി. സതീശന്‍. രാജ്യത്തിനുവേണ്ടി പുതുതായി എന്ത് നിര്‍മ്മിച്ചാലും അത് ജനാധിപത്യ മൂല്യങ്ങളിലും ഭരണഘടനാ തത്വങ്ങളിലും ഉറപ്പിച്ചു കൊണ്ടാവണമെന്നും അദ്ദേഹം പറഞ്ഞു. പാര്‍ലമെന്റ് മന്ദിരത്തിന്റെ ഉദ്ഘാടന ചടങ്ങിനെ വിമര്‍ശിച്ചുകൊണ്ട് ഫേസ്ബുക്കില്‍ പങ്കുവെച്ച പോസ്റ്റിലാണ് വി. ഡി. സതീശന്‍ നയം വ്യക്തമാക്കിയത്.
ജനാധിപത്യ സഭകളില്‍ രണ്ട് മഹദ് സാന്നിധ്യങ്ങളെ ഉള്ളൂ. ഒന്ന് ജനങ്ങള്‍ രണ്ടാമത്തേത് ഭരണഘടന. പ്രണമിക്കേണ്ടത് അവയ്ക്ക് മുന്നിലാണെന്നും അദ്ദേഹം പറഞ്ഞു.
ഫേസ്ബുക്ക് കുറുപ്പിന്റെ പൂര്‍ണ രൂപം:
ജനാധിപത്യം അരിയിട്ട് വാഴിക്കലുകളോ ഫോട്ടോ ഷൂട്ടുകളോ അല്ല. രാജ്യത്തിനുവേണ്ടി എന്ത് പുതുതായി നിര്‍മ്മിച്ചാലും അത് ജനാധിപത്യ മൂല്യങ്ങളിലും ഭരണഘടനാ തത്വങ്ങളിലും ഉറപ്പിച്ചു കൊണ്ടാവണം. പുതിയ പാര്‍ലമെന്റ് മന്ദിരത്തിന്റെ ഉദ്ഘാടന ചടങ്ങില്‍ ഇന്ത്യയുടെ രാഷ്ട്രപതിയും ഉപരാഷ്ട്രപതിയും എവിടെ? ഞാനാണ് എല്ലാം എന്ന് ഒരാള്‍ വിചാരിക്കുന്നതാണ് ഏകാധിപത്യം. എല്ലാ അര്‍ഥത്തിലും അത് ഭീരുത്വമാണ്. എന്നിലൂടെ എല്ലാം സംഭവിച്ചു, ഞാന്‍ മാത്രമാണ് ഇതിനെല്ലാം കാരണഭൂതന്‍ എന്നൊരാള്‍ സ്വയം ധരിക്കുന്നത് ചരിത്രത്തെ നിഷേധിക്കലാണ്. നിര്‍ഭാഗ്യവശാല്‍ നരേന്ദ്ര മോദിയും അനുയായികളും ഇപ്പോള്‍ ചെയ്യുന്നത് ഇതൊക്കെയാണ്.
ജനാധിപത്യ സഭകളില്‍ രണ്ട് മഹദ് സാന്നിധ്യങ്ങളെ ഉള്ളൂ. ഒന്ന് ജനങ്ങള്‍ രണ്ടാമത്തേത് ഭരണഘടന. പ്രണമിക്കേണ്ടത് അവയ്ക്ക് മുന്നിലാണ്. സംഘപരിവാറിനോടും ഫാസിസത്തോടും പൊരുതാനും ഇന്ത്യയുടെ ഉന്നമനത്തിനായി സ്വയം സമര്‍പ്പിക്കാനും ഗാന്ധിയേയും നെഹ്‌റുവിനേയും അവരുടെ പാതയില്‍ സഞ്ചരിച്ച അസംഖ്യം ദേശസ്‌നേഹികളേയും ഓര്‍ക്കണം. ദേശസ്‌നേഹവും അതിതീവ്ര ദേശീയതയും തമ്മില്‍ അജഗജാന്തരമുണ്ട്.
