ഗുവാഹത്തി- ടിഷര്‍ട്ട്, ജീന്‍സ്, ലെഗ്ഗിംഗ്‌സ് എന്നിവ ഒഴിവാക്കി സ്‌കൂള്‍ അധ്യാപകര്‍ക്കായി അസം സര്‍ക്കാര്‍ ഡ്രസ് കോഡ് പുറപ്പെടുവിച്ചു. അധ്യാപകരില്‍ ചിലര്‍ പൊതുജനങ്ങള്‍ക്ക് സ്വീകാര്യമല്ലെന്ന് തോന്നുന്ന വസ്ത്രങ്ങള്‍ ധരിക്കുന്ന പശ്ചാത്തലത്തിലാണ് ചില വസ്ത്രങ്ങള്‍ക്ക് വിലക്ക്. വനിതാ അധ്യാപകര്‍ മാന്യമായ സല്‍വാര്‍ സ്യൂട്ട് അല്ലങ്കില്‍ സാരി ധരിക്കണം, കൂടാതെ ടിഷര്‍ട്ട്, ജീന്‍സ്, ലെഗ്ഗിംഗ്‌സ് തുടങ്ങിയ സാധാരണ വസ്ത്രങ്ങള്‍ ധരിക്കരുതെന്ന് സര്‍ക്കാര്‍ വിജ്ഞാപനത്തില്‍ പറയുന്നു.
അദ്ധ്യാപകര്‍ ഔപചാരികമായ വസ്ത്രങ്ങള്‍ ധരിക്കണമെന്നും കാഷ്വല്‍ വസ്ത്രങ്ങള്‍ കര്‍ശനമായി ഒഴിവാക്കണമെന്നും വെള്ളിയാഴ്ച പുറപ്പെടുവിച്ച വിജ്ഞാപനത്തില്‍ പറയുന്നു.
സ്‌കൂള്‍ അധ്യാപകര്‍ക്ക് നിര്‍ദ്ദേശിച്ചിരിക്കുന്ന വസ്ത്രധാരണത്തെക്കുറിച്ച് ചില സംശയങ്ങള്‍ ഉയര്‍ന്ന സാഹചര്യത്തിലാണ് വ്യക്തത വരുത്തുന്നതെന്ന് ശനിയാഴ്ച ട്വിറ്ററില്‍ ഉത്തരവ് പങ്കിട്ടുകൊണ്ട് വിദ്യാഭ്യാസ മന്ത്രി റനോജ് പെഗു കുറിച്ചു. ചില അധ്യാപകര്‍ അവര്‍ക്ക് ഇഷ്ടമുള്ള വസ്ത്രം ധരിക്കുന്ന ശീലമുണ്ട്. അത് പൊതുജനങ്ങള്‍ക്ക് സ്വീകാര്യമല്ലെന്ന് അറിയിപ്പില്‍ പറഞ്ഞു.
അദ്ധ്യാപകന്‍ എല്ലാത്തരം മാന്യതയ്ക്കും ഒരു മാതൃകയായിരിക്കുമെന്ന് പ്രതീക്ഷിക്കുന്നതിനാല്‍ പ്രത്യേകിച്ച് ചുമതലകള്‍ നിര്‍വഹിക്കുമ്പോള്‍, ജോലിസ്ഥലത്ത് മാന്യത, പ്രൊഫഷണലിസം, ലക്ഷ്യത്തിന്റെ ഗൗരവം എന്നിവ പ്രതിഫലിപ്പിക്കുന്ന ഒരു ഡ്രസ് കോഡ് പിന്തുടരേണ്ടത് ആവശ്യമാണ്.
നിര്‍ദ്ദിഷ്ട ഡ്രസ് കോഡ് അനുസരിച്ച്, പുരുഷ അധ്യാപകര്‍ ഷര്‍ട്ട്, പാന്റസ് എന്നിങ്ങനെ ഔപചാരിക വസ്ത്രം മാത്രമേ ധരിക്കാവൂ.
സ്ത്രീപുരുഷ അദ്ധ്യാപകര്‍ വൃത്തിയുള്ളതും എളിമയുള്ളതും മാന്യവുമായ വസ്ത്രങ്ങള്‍ ധരിക്കണം. അത് തിളങ്ങുന്നതായി തോന്നരുതെന്നും വിജ്ഞാപനത്തില്‍ പറയുന്നു.
