- പിടിച്ചെടുത്തത് 1.17 കോടി രൂപയുടെ സ്വർണമെന്ന് പോലീസ്
(കരിപ്പൂർ) മലപ്പുറം - സ്വർണക്കടത്തിനിടെ കരിപ്പൂരിൽ യുവതി പോലീസിന്റെ പിടിയിലായി. ജിദ്ദയിൽ നിന്നെത്തിയ കോഴിക്കോട് ജില്ലയിലെ കുന്ദമംഗലം സ്വദേശിനി ഷബ്‌നയാണ് പിടിയിലായത്.
1.17 കോടി രൂപ വിലമതിക്കുന്ന 1884 ഗ്രാം സ്വർണമാണ് ഉൾവസ്ത്രത്തിൽ ഒളിപ്പിച്ച് കടത്താൻ ശ്രമിച്ചതെന്ന് പോലീസ് പറഞ്ഞു. മിശ്രിത രൂപത്തിലാക്കിയ സ്വർണം പാക്കറ്റുകളിലാക്കി ഉൾവസ്ത്രത്തിൽ ഒളിപ്പിച്ച് കടത്തുകയായിരുന്നു. കസ്റ്റംസ് പരിശോധന കഴിഞ്ഞ് വിമാനത്താവളത്തിന് പുറത്തിറങ്ങിയ ശേഷമാണ് യുവതിയിൽനിന്നും പോലീസ് സംഘം സ്വർണം പിടികൂടിയത്.
പോലീസിനു ലഭിച്ച രഹസ്യവിവരത്തെ തുടർന്ന് യുവതിയെ പിടികൂടുകയായിരുന്നു. ചോദ്യം ചെയ്യലിൽ സ്വർണമില്ലെന്ന് പറഞ്ഞ യുവതിയുടെ ലഗേജിലും ഹാൻഡ് ബാഗിലും സ്വർണം കണ്ടെത്താൻ സാധിച്ചിരുന്നില്ല. ശേഷം ഇവരുടെ കാറിന്റെ ഡോറിൽ നിന്നാണ് സ്വർണമിശ്രിതം കണ്ടെത്തിയതെന്ന് അന്വേഷണ സംഘം പറഞ്ഞു. പ്രതി സ്വർണക്കടത്തു സംഘത്തിന്റെ കാരിയറായി പ്രവർത്തിക്കുന്ന ആളാണെന്നാണ് പോലീസ് കരുതുന്നത്. വിശദമായി ചോദ്യം ചെയ്തു വരികയാണെന്ന് പോലീസ് പറഞ്ഞു.
