തന്റെ വീട്ടുമുറ്റത്തെ മാങ്ങ കഴിച്ച് നിരവധി ദമ്പതികള്‍ക്ക് കുട്ടികളുണ്ടായി എന്ന് അവകാശപ്പെട്ട സംഭാജി ഭിഡെയ്ക്ക് നാസിക് മുനിസിപ്പല്‍ കോര്‍പ്പറേഷന്‍ കാരണം കാണിക്കല്‍ നോട്ടീസ് അയച്ചു. മാങ്ങ കഴിച്ച് കുട്ടികള്‍ ഉണ്ടായ ദമ്പതികളുടെ പേരുവിവരങ്ങള്‍ കോര്‍പ്പറേഷനില്‍ അറിയിക്കണമെന്നാണ് ഭിഡെയോട് ആവശ്യപ്പെട്ടിരിക്കുന്നത്.
തന്റെ തോട്ടത്തിലെ മാങ്ങകഴിച്ച് നിരവധി ദമ്പതികള്‍ക്ക് ആണ്‍കുട്ടികളുണ്ടായെന്നും ഭിഡെ പറഞ്ഞിരുന്നു. നാസിക്കില്‍ നടന്ന ഒരു പൊതു സമ്മേളനത്തില്‍ പ്രസംഗിക്കവെയാണ് അദ്ദേഹം വിവാദ പരാമര്‍ശം നടത്തിയത്. മാങ്ങയ്ക്ക് വളരെയധികം പോഷകഗുണങ്ങളുണ്ട്. തന്റെ തോട്ടത്തിലെ മാങ്ങകള്‍ കഴിച്ച് നിരവധി പേര്‍ക്ക് പുത്രഭാഗ്യം ഉണ്ടായിട്ടുണ്ട്. ഈ രഹസ്യം എന്റെ അമ്മയോട് മാത്രമെ പങ്കുവെച്ചിട്ടുള്ളത്. 150 ദമ്പതികള്‍ക്കാണ് മാങ്ങ കഴിച്ച് കുഞ്ഞുങ്ങള്‍ ഉണ്ടായതെന്നും ഭിഡെ പറഞ്ഞിരുന്നു. ഇവരുടെ പേര് വിവരങ്ങള്‍ വ്യക്തമാക്കണമെന്നാണ് കോര്‍പ്പറേഷന്‍ ആവശ്യപ്പെട്ടിരിക്കുന്നത്.
