തിരുവനന്തപുരം- ബി. ജെ. പി പിടിമുറുക്കിയതോടെ മണിപ്പൂര്‍ അശാന്തിയിലേക്ക് കൂപ്പുകുത്തിയെന്നും മണിപ്പൂരില്‍ നിന്ന് കേരളത്തിന് വലിയ പാഠം പഠിക്കാനുണ്ടെന്നും കെ. പി. സി. സി. പ്രസിഡന്റ് കെ. സുധാകരന്‍ പറഞ്ഞു
ബി. ജെ. പിയോട് ആഭിമുഖ്യമുള്ള മെയ്തെയ് വിഭാഗത്തിന്റെ നേതൃത്വത്തിലാണ് മണിപ്പൂരില്‍ കലാപം നടക്കുന്നത്. കലാപങ്ങളിലും ഗോത്രവര്‍ഗക്കാര്‍ക്കും ന്യൂനപക്ഷങ്ങള്‍ക്കും എതിരെ നടക്കുന്ന അക്രമങ്ങളിലും പ്രതിഷേധിച്ച് കെ. പി. സി. സിയുടെ നേതൃത്വത്തില്‍ ഞായറാഴ്ച മണ്ഡലം കോണ്‍ഗ്രസ് കമ്മിറ്റികളുടെ ആഭിമുഖ്യത്തില്‍ പന്തംകൊളുത്തി പ്രകടനം നടത്തുമെന്നും സുധാകരന്‍ അറിയിച്ചു.
പോലീസിന്റേയും ബി. ജെ. പി ഭരണകൂടത്തിന്റെയും പിന്തുണയോടെയാണ് മണിപ്പൂരില്‍ അക്രമങ്ങള്‍ അരങ്ങേറുന്നത്. സമാധാനപരമായി ജീവിച്ച മണിപ്പൂര്‍ ജനസമൂഹമാണ് ബി. ജെ. പി പിടിമുറുക്കിയതോടെ അശാന്തിയിലേക്ക് നിലംപതിച്ചത്. 54 പേര്‍ കൊല്ലപ്പെടുകയും പതിനായിരത്തോളം പേരെ മാറ്റിത്താമസിപ്പിക്കുകയും ചെയ്ത സംസ്ഥാനത്ത് അമ്പതോളം ക്രൈസ്തവ ദേവാലയങ്ങളാണ് ആക്രമിക്കപ്പെട്ടത്. മണിപ്പൂരിലെ അശാന്തി സമീപ വടക്കുകിഴക്കന്‍ സംസ്ഥാനങ്ങളെയും ബാധിക്കുമെന്ന് ആശങ്കയുണ്ടെന്നും കെ. സുധാകരന്‍ പറഞ്ഞു.
വിവിധ സമുദായങ്ങള്‍ സാഹോദര്യത്തോടെ കഴിയുന്ന കേരളത്തിലേക്ക് ബി. ജെ. പി കടന്നുവന്നാല്‍ മണിപ്പൂരിലേതുപോലെ വലിയ ദുരന്തത്തിന് വഴിയൊരുക്കുമെന്നും സുധാകരന്‍ വിശദീകരിച്ചു.
