തിരുവനന്തപുരം- മാനവികതയുടെ ഉത്കൃഷ്ടമായ സന്ദേശമാണ് റമദാനും ഈദുല് ഫിത്വറും മുന്നോട്ടുവെക്കുന്നതെന്ന് മുഖ്യമന്ത്രി പിണറായി വനിജയന് പറഞ്ഞു. പ്രതിസന്ധികള് മറികടന്ന് സമാധാനവും സമത്വവും പുലരുന്ന ലോകത്തിനായി പരിശ്രമിക്കുന്ന മനുഷ്യര്ക്ക് സ്നേഹത്തിന്റെയും കാരുണ്യത്തിന്റെയും ഉള്ക്കരുത്ത് ഈദുല് ഫിത്വര് പകരുന്നുവെന്നും മുഖ്യമന്ത്രിയുടെ ഈദ് സന്ദേശത്തില് പറഞ്ഞു.
വ്രതാനുഷ്ഠാനത്തിലൂടെ ആര്ജ്ജിച്ച സ്വയം നവീകരണം മുന്പോട്ടുള്ള ജീവിതത്തില് കുടുംബത്തിനും സമൂഹത്തിനും ഒരുപോലെ പ്രയോജനപ്പെടുത്താന് വിശ്വാസികള്ക്ക് സാധിക്കണം. അപ്പോള് മാത്രമേ അതിന്റെ മഹത്വം കൂടുതല് തിളക്കത്തോടെ പ്രകാശിക്കുകയുള്ളൂ. ആ വെളിച്ചം ഈ ലോകത്തെ പ്രകാശപൂര്ണ്ണമാക്കട്ടെ. നന്മയും ഒരുമയും പുലരുന്ന ലോകം നമുക്കൊരുമിച്ചു പടുത്തുയര്ത്താം. ഏവര്ക്കും ഹൃദയപൂര്വ്വം ചെറിയ പെരുന്നാള് ആശംസകള് നേരുന്നുവെന്നും മുഖ്യമന്ത്രി പറഞ്ഞു.
