മുംബൈ- ബി.ജെ.പിക്ക് എതിരായ പ്രതിപക്ഷത്തിന്റെ വിശാല സഖ്യം രൂപീകരിക്കുന്നതിന്റെ ഭാഗമായി കോൺഗ്രസ് നേതാക്കൾ ശിവസേന നേതാവ് ഉദ്ധവ് താക്കറെയെ കണ്ടു. കോൺഗ്രസ് ജനറൽ സെക്രട്ടറി കെ.സി വേണുഗോപാൽ ഇന്ന് മുംബൈയിലെത്തി ഉദ്ധവ് താക്കറെയുമായി ചർച്ച നടത്തി. 2024 ലെ ദേശീയ തിരഞ്ഞെടുപ്പിന് മുന്നോടിയായുള്ള പ്രതിപക്ഷ ഐക്യത്തെക്കുറിച്ചും പ്രതിപക്ഷ നേതാക്കളെ ലക്ഷ്യമിട്ട് ബി.ജെ.പി സർക്കാർ കേന്ദ്ര ഏജൻസികളെ ദുരുപയോഗം ചെയ്യുന്നതിനെക്കുറിച്ചും ചർച്ച ചെയ്തു.
'ഉദ്ധവ് ജിയെ കാണാനും കോൺഗ്രസ് അധ്യക്ഷൻ മല്ലികാർജുൻ ഖാർഗെ, സോണിയ ഗാന്ധി, രാഹുൽ ഗാന്ധി എന്നിവരുടെ സന്ദേശം അറിയിക്കാനുമാണ് ഞാൻ ഇവിടെ വന്നത്. ഇന്ത്യയിലെയും മഹാരാഷ്ട്രയിലെയും നിലവിലെ രാഷ്ട്രീയ സാഹചര്യത്തിൽ, ഉദ്ധവ് ജി ജനാധിപത്യ വിരുദ്ധ ശക്തികൾക്കെതിരെ പോരാടുകയാണ്. നരേന്ദ്രമോഡിയും അമിത് ഷായും ചേർന്ന് ജനാധിപത്യം പൂർണ്ണമായും അട്ടിമറിച്ചിരിക്കുന്നു. ഉദ്ധവ് ജിയെയും മറ്റ് പാർട്ടികളെയും ലക്ഷ്യം വയ്ക്കാൻ ഇ.ഡി, സി.ബി.ഐ എന്നിവ ഉപയോഗിക്കുന്നു- വേണുഗോപാൽ യോഗത്തിന് ശേഷം മാധ്യമപ്രവർത്തകരോട് പറഞ്ഞു.
'വിശാലമായ പ്രതിപക്ഷ ഐക്യത്തിന്റെ ഭാഗമായാണ് ഖാർഗെയും രാഹുൽ ഗാന്ധിയും ബീഹാർ മുഖ്യമന്ത്രി നിതീഷ് കുമാറിനെയും അദ്ദേഹത്തിന്റെ ഡെപ്യൂട്ടി തേജസ്വി യാദവിനെയും നാഷണലിസ്റ്റ് കോൺഗ്രസ് പാർട്ടി (എൻ.സി.പി) തലവൻ ശരദ് പവാറിനെയും കഴിഞ്ഞയാഴ്ച കണ്ടത്. ദൽഹി മദ്യനയക്കേസിൽ സി.ബി.ഐ ചോദ്യം ചെയ്ത ദൽഹി മുഖ്യമന്ത്രി അരവിന്ദ് കെജ്‌രിവാളുമായും ബിഹാർ നേതാക്കളായ ഇരുവരും കൂടിക്കാഴ്ച നടത്തിയിരുന്നു.
'നരേന്ദ്രമോഡിയുടെ സ്വേച്ഛാധിപത്യത്തിനെതിരെ പ്രതിപക്ഷം ഒറ്റക്കെട്ടായി പോരാടും. അഭിപ്രായവ്യത്യാസങ്ങളുണ്ടാകാം. കോൺഗ്രസിനും സേനയ്ക്കും എൻ.സി.പിക്കും അവരുടേതായ പ്രത്യയശാസ്ത്രമുണ്ട്, പക്ഷേ നമ്മൾ അഭിമുഖീകരിക്കാത്ത വലിയ പ്രശ്‌നങ്ങളാണ് രാജ്യം അഭിമുഖീകരിക്കുന്നത്. അതുകൊണ്ടാണ് ഞങ്ങൾ ഈ വിഷയങ്ങളെല്ലാം ചർച്ച ചെയ്തത്. നമ്മൾ എല്ലാവരും ഒത്തുചേർന്ന് ഈ ആളുകളോട് പോരാടണമെന്ന് ഞങ്ങൾ എല്ലാവരും സമ്മതിക്കുന്നു-'വേണുഗോപാൽ പറഞ്ഞു.
രാഹുൽ ഗാന്ധി മുംബൈയിലെത്തി ഉദ്ധവ് താക്കറെയെ കാണുമെന്നും വേണുഗോപാൽ പറഞ്ഞു. സേനാ മേധാവി ഉടൻ ദൽഹി സന്ദർശിക്കുമെന്നും കോൺഗ്രസ് ജനറൽ സെക്രട്ടറി പറഞ്ഞു. എല്ലാവർക്കും അവരുടേതായ പ്രത്യയശാസ്ത്രമുണ്ടെന്ന് വ്യക്തമാക്കിയ താക്കറെ ഈ പോരാട്ടം ജനാധിപത്യത്തെ സംരക്ഷിക്കാനുള്ളതാണെന്നും അറിയിച്ചു.
