കോഴിക്കോട്- മെഡിക്കൽ കോളേജ് ജംഗ്ഷനിൽ കാൽനട യാത്രക്കാരിയെ ബസ് ഇടിച്ച് അതേ ബസിന്റെ ചക്രത്തിനടിയിൽ പെട്ട് യുവതി മരിച്ചു. ബാലുശേരി എരമംഗലം കണ്ണങ്കോട് ചെട്ടിയാം കണ്ടി മീത്തൽ രവീന്ദ്രന്റെ ഭാര്യ ഷൈനി (47)യാണ് മരിച്ചത്. മാവൂർ ഭാഗത്ത് നിന്ന് നഗരത്തിലേക്ക് അമിത വേഗതയിൽ വരികയായിരുന്ന ബസ് വളവിൽ വച്ച് ഷൈനി യെ ഇടിച്ചിട്ടും നിർത്താതെ മുന്നോട്ട് പോയതോടെ ഇവർ ബസിന്റെ ചക്രത്തിനടിയിലായാവുകയായിരുന്നുവെന്ന് ദൃക്‌സാക്ഷികൾ പറയുന്നു. അപകടം നടന്ന ഉടൻ ഡ്രൈവർ ഇറങ്ങി ഓടി. ബസിന്റെ ഹാൻഡ് ബ്രേക്ക് ഇട്ടതിനാൽ ആളുകൾ ബസ് തള്ളി മാറ്റിയാണ് ചക്രത്തിനടിയിൽനിന്ന് ഇവരെ പുറത്തെടുത്തത്. തലക്കും വാരിയെല്ലിനും ഗുരുതരമായി പരിക്കേറ്റ ഷൈനി യെ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം മോർച്ചറിയിലേക്ക് മാറ്റി. കാവുന്തറ വാളുകണ്ടി മീത്തൻ പരേതനായ തെയ്യോന്റെ മകളാണ്.മാതാവ്: നാരായണി. മക്കൾ: ഹരിദേവ്, ഹരിപ്രസാദ്.സഹോദരങ്ങൾ: ശശി, അശോകൻ.
