കോഴിക്കോട് : കോഴിക്കോട് ഫാത്തിമാ ആശുപത്രിയിലെ ഡോക്ടറെ രോഗിയുടെ ബന്ധുക്കള് മര്ദ്ദിച്ചതില് കാര്യമായ നടപടികള് ഉണ്ടാകാത്തതില് പ്രതിഷേധിച്ച് ഇന്ത്യന് മെഡിക്കല് അസോസിയേഷന്റെ ആഭിമുഖ്യത്തില് നാളെ ഡോക്ടര്മാര് സംസ്ഥാന വ്യാപകമായി പണിമുടക്കും. രാവിലെ 6 മുതല് വൈകിട്ട് 6 വരെയുള്ള പണിമുടക്കില് കേരള ഗവ. പോസ്റ്റ് ഗ്രാജ്വേറ്റ് മെഡിക്കല് ടീച്ചേഴ്സ് അസോസിയേഷന്, കേരള ഗവ. സ്പെഷലിസ്റ്റ് ഡോക്ടേഴ്സ് അസോസിയേഷന്, ഇന്ത്യന് ഡെന്റല് അസോസിയേഷന് എന്നീ സംഘടനകള് പങ്കെടുക്കും. നാളെ സ്വകാര്യ, സര്ക്കാര് ആശുപത്രികളില് ഒപി വിഭാഗം പ്രവര്ത്തിക്കില്ല. എന്നാല്, അത്യാഹിതവിഭാഗം പ്രവര്ത്തിക്കുമെന്നും അടിയന്തര ശസ്ത്രക്രിയകള് നടത്തുമെന്നും ഡോക്ടര്മാരുടെ സംഘടനകള് അറിയിച്ചു. സ്വകാര്യ മെഡിക്കല് കോളജുകളില് അത്യാഹിത വിഭാഗവും അടിയന്തര ശസ്ത്രക്രിയാവിഭാഗവും മാത്രമേ പ്രവര്ത്തിക്കൂ.
