കൊച്ചി : ലൈഫ് മിഷന് ഇടപാടുമായി ബന്ധപ്പെട്ട് കൂടുതല് രേഖകള് വേണമെന്ന് ആവശ്യപ്പെട്ട് എന്ഫോഴ്സ്മെന്റ് ഡയറക്ടറേറ്റ് ലൈഫ് മിഷന് കത്ത് നല്കി. വടക്കാഞ്ചേരി ലൈഫ് മിഷന് പദ്ധതിയുമായി ബന്ധപ്പെട്ട മുഴുവന് രേഖകളും ഹാജരാക്കാനാണ് നിര്ദേശം. ലൈഫ് മിഷന് പദ്ധതിയിലെ അഴിമതിയിലെ കള്ളപ്പണക്കേസില് മുഖ്യമന്ത്രിയുടെ അഡീഷണല് പ്രൈവറ്റ് സെക്രട്ടറി സി എം രവീന്ദ്രന്റെ ചോദ്യം ചെയ്യല് തുടരുന്നതിനിടെയാണ് കൂടുതല് രേഖകള് ആവശ്യപ്പെട്ട് ഇ ഡി കത്ത് നല്കിയത്. ഇന്ന് രാവിലെയാണ് സി. എം രവീന്ദ്രന് എന്ഫോഴ്സ് ഡയറക്ടറേറ്റിന് മുന്നില് ചോദ്യം ചെയ്യലിന് ഹാജരായത്. ചോദ്യം ചെയ്യല് തുടരുകയാണ്.
ചോദ്യം ചെയ്യലിന് ഹാജരാക്കണമെന്ന് ആവശ്യപ്പെട്ട് ഇ. ഡി സി.എം രവീന്ദ്രന് നോട്ടീസ് നല്കിയിരുന്നു.
ഫെബ്രുവരി 27ന് ഹാജരാകണമെന്ന് ഇ.ഡി നിര്ദ്ദേശിച്ചിരുന്നുവെങ്കിലും അന്ന് സി എം രവീന്ദ്രന് എത്തിയിരുന്നില്ല. നിയമസഭാ സമ്മേളനം നടക്കുന്നതിനാല് ചോദ്യം ചെയ്യലിന് എത്താന് കഴിയില്ല എന്നായിരുന്നു അദ്ദേഹം ഇ.ഡിക്ക് മറുപടി നല്കിയത്. തുടര്ന്നാണ് രണ്ടാം തവണയും സിഎം രവീന്ദ്രന് ഇ.ഡി നോട്ടീസ് നല്കിയത്. മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം.ശിവശങ്കറിനെ ഇ ഡി അറസ്റ്റ് ചെയ്തിരുന്നു. അതിന് പിന്നാലെയാണ് സി എം രവീന്ദ്രനെ ചോദ്യം ചെയ്യുന്നത്.
