ന്യൂദൽഹി- ബി.എസ്.പി എം.എൽ.എയെ കൊലപ്പെടുത്തിയ കേസിലെ സാക്ഷിയെ കൊന്ന കേസിലെ പ്രതിയെ ഏറ്റുമുട്ടലിൽ വധിച്ചതായി യു.പി പോലീസ്. 2005ൽ ബഹുജൻ സമാജ് പാർട്ടി നിയമസഭാംഗം രാജുപാലിനെ കൊലപ്പെടുത്തിയ കേസിലെ പ്രധാന സാക്ഷിയായ ഉമേഷ് പാലിനെ ഇക്കഴിഞ്ഞ 24ന് വെടിവെച്ചുകൊന്ന കേസിലെ ആറു പേരിൽ ഒരാളായ ഉസ്മാൻ എന്ന വിജയ് ചൗധരിയാണ് പ്രയാഗ്രാജിൽ നടന്ന ഏറ്റുമുട്ടലിൽ കൊല്ലപ്പെട്ടത്. തിങ്കളാഴ്ച പുലർച്ചെയാണ് ഏറ്റുമുട്ടലുണ്ടായത്. ഇയാളുടെ മരണം സ്ഥിരീകരിച്ചതായും മൃതദേഹം മോർച്ചറിയിലേക്കു മാറ്റിയതായും പോലീസ് അറിയിച്ചു.
കഴിഞ്ഞ ഫെബ്രുവരി 24ന് ആറംഗ സംഘം ഉമേഷിനെ കൊലപ്പെടുത്തിയിരുന്നു. ഇതിലെ പ്രധാന പ്രതിയാണ് കൊല്ലപ്പെട്ട ഉസ്മാൻ. വിജയ് ചൗധരിയെന്ന പേരു മാറ്റി ഇയാൾ പിന്നീട് ഉസ്മാൻ എന്ന പേരു സ്വീകരിക്കുകയായിരുന്നു.
തിങ്കളാഴ്ച പുലർച്ചെയോടെ പ്രയാഗരാജിനടുത്തുള്ള കൗന്ധ്യാരയിൽ പോലീസ് ഇയാളെ കണ്ടെത്തി. കീഴടങ്ങാൻ ആവശ്യപ്പെട്ടതോടെ ഇയാൾ പോലീസിന് നേരെ വെടിയുതിർത്തു. തുടർന്ന് ഏറ്റുമുട്ടലുണ്ടാകുകയും പോലീസ് ഇയാളെ വെടിവെച്ചു വീഴ്ത്തുകയുമായിരുന്നു. ഉടൻ ആശുപത്രിയിലെത്തിച്ചെങ്കിലും മരിച്ചു.
വിജയ് ചൗധരിയെക്കുറിച്ച് വിവരം നൽകുന്നവർക്ക് യു.പി പോലീസ് നേരത്തെ അമ്പതിനായിരം രൂപ പാരിതോഷികം പ്രഖ്യാപിച്ചിരുന്നു. ഫെബ്രുവരി 27ന് നടന്ന പോലീസ് ഏറ്റുമുട്ടലിൽ ഉമേഷ് പാൽ വധക്കേസിലെ മറ്റൊരു പ്രതിയായ അതിഖ് അഹമ്മദ് എന്നയാളും കൊല്ലപ്പെട്ടിരുന്നു. ഉമേഷ് വധക്കേസിലെ പ്രതികളുടെ വിവരം നൽകുന്നവർക്ക് രണ്ടര ലക്ഷം രൂപ നൽകുമെന്നായിരുന്നു പോലീസ് പ്രഖ്യാപനം. ഉമേഷ് പാലിനെ കൊല്ലുന്നതിന്റെ സി.സി.ടി.വി ദൃശ്യങ്ങൾ പുറത്തുവന്നതോടെ സംസ്ഥാനത്തിന്റെ ക്രമസമാധാന നിലയെക്കുറിച്ച് ചോദ്യങ്ങൾ ഉയർന്നു. കുറ്റകൃത്യത്തിൽ ഏർപ്പെട്ടിരിക്കുന്നവരെ സർക്കാർ തകർക്കുമെന്ന് മുഖ്യമന്ത്രി യോഗി ആദിത്യനാഥ് പറഞ്ഞിരുന്നു.
മുഖ്യമന്ത്രിയുടെ പരാമർശത്തെ പരാമർശിച്ച് ബി.ജെ.പി എം.എൽ.എയും മുഖ്യമന്ത്രിയുടെ മുൻ ഉപദേഷ്ടാവുമായ ശലഭ് മണി ത്രിപാഠി ഇന്ന് രാവിലെ ഹിന്ദിയിൽ ഞങ്ങൾ അവരെ തകർക്കുമെന്ന് ഞങ്ങൾ പറഞ്ഞിരുന്നു, ഉമേഷ് പാലിന് നേരെ ആദ്യ ബുള്ളറ്റ് തൊടുത്ത ആൾ വെടിയേറ്റ് മരിച്ചു. ഒരു ഏറ്റുമുട്ടൽ എന്ന് ട്വീറ്റ് ചെയ്തു,
VIDEO | Uttar Pradesh ADG Law and Order Prashant Kumar's press conference on Monday's encounter by Prayagraj police in the Umesh Pal murder case. pic.twitter.com/TeJkxrt66e
— Press Trust of India (@PTI_News) March 6, 2023
വിജയ് ചൗധരിയെ മരിച്ച നിലയിൽ എത്തിച്ചതായി പ്രയാഗ്രാജ് ആശുപത്രിയിലെ മെഡിക്കൽ ഓഫീസർ ഡോ.ബദ്രി വിശാൽ സിംഗ് പറഞ്ഞു. 'ഞങ്ങൾ പരിശോധന നടത്തി, തുടർന്ന് അദ്ദേഹം മരിച്ചതായി പ്രഖ്യാപിക്കുകയും മൃതദേഹം മോർച്ചറിയിലേക്ക് അയക്കുകയും ചെയ്തു. മുൻ സമാജ്വാദി പാർട്ടി എം.പി അതിഖ് അഹമ്മദിന്റെ ഇളയ സഹോദരൻ ഖാലിദ് അസിമിനെ പരാജയപ്പെടുത്തി അലഹബാദ് (വെസ്റ്റ്) നിയമസഭാ സീറ്റിൽ വിജയിച്ച് മാസങ്ങൾക്ക് ശേഷമാണ് രാജു പാൽ കൊല്ലപ്പെട്ടത്. അതിഖ് അഹമ്മദും സഹോദരനും മുൻ എം.എൽ.എയുമായ അഷ്റഫും രാജു പാൽ വധക്കേസിൽ പ്രതികളും ഇപ്പോൾ ജയിലിലുമാണ്. ഉമേഷ് പാലിന്റെ കൊലപാതകത്തെ ചൊല്ലിയുള്ള ബഹളത്തിനിടെ പ്രതിപക്ഷത്തെ തിരിച്ചടിച്ച മുഖ്യമന്ത്രി ആദിത്യനാഥ് അഖിലേഷ് യാദവിന്റെ സമാജ്വാദി പാർട്ടിയുടെ എം.പിയാണ് അതിഖ് അഹമ്മദ് എന്നും തന്റെ സർക്കാർ സംസ്ഥാനത്ത് 'മാഫിയ രാജ്' അനുവദിക്കില്ലെന്നും പറഞ്ഞിരുന്നു.
