ലണ്ടൻ- ഇംഗ്ലണ്ടിലും വെയിൽസിലും വിവാഹപ്രായം പതിനെട്ടാക്കി ഉയർത്തി. ഇതേവരെ പതിനാറും പതിനേഴും വയസുള്ള കുട്ടികൾക്ക് രക്ഷിതാക്കളുടെ അനുമതിയോടെ വിവാഹം അനുവദിച്ചിരുന്നു. പുതിയ നിയമം അനുസരിച്ച് പതിനെട്ട് വയസിന് താഴെയുള്ള പെൺകുട്ടികളുടെ വിവാഹം നിയമവിരുദ്ധമായി കണക്കാക്കും. കേസും നിയമനടപടികളും നേരിടേണ്ടിയും വരും. നേരത്തെ പതിനെട്ട് വയസിന് താഴെയുള്ളവരുടെ വിവാഹം കുറ്റകരമായിരുന്നത് ഇവരെ നിർബന്ധിത വിവാഹത്തിന് ഇരയാക്കിയെങ്കിൽ മാത്രമായിരുന്നു. ദുർബലരായ കുട്ടികളെ വിവാഹത്തിന് നിർബന്ധിതരാക്കുന്നതിൽ നിന്ന് സംരക്ഷിക്കാൻ ഈ മാറ്റങ്ങൾ സഹായിക്കുമെന്ന് സർക്കാർ പറഞ്ഞു. കുറ്റക്കാരെന്ന് കണ്ടെത്തുന്നവർക്ക് ഏഴ് വർഷം വരെ തടവ് ലഭിക്കും. കുറഞ്ഞ വിവാഹപ്രായം 18 ആക്കി ഉയർത്താനുള്ള തീരുമാനത്തെ എംപിമാർ പിന്തുണച്ചു. അതേസമയം, സ്‌കോട്ട്‌ലൻഡിലും നോർത്തേൺ അയർലൻഡിലും മാറ്റങ്ങൾ ബാധകമല്ല. അവിടെ വിവാഹത്തിനുള്ള കുറഞ്ഞ പ്രായം 16 ആയി തുടരും. വടക്കൻ അയർലണ്ടിൽ 18 വയസ്സിന് താഴെയുള്ളവർക്ക് വിവാഹം ചെയ്യാൻ മാതാപിതാക്കളുടെ സമ്മതം ആവശ്യമാണ്. എന്നാൽ സ്‌കോട്ട്‌ലൻഡിൽ ഇത് ബാധകമല്ല.
നോർത്തേൺ അയർലണ്ടിലെ മന്ത്രിമാർ വിവാഹത്തിന്റെ കുറഞ്ഞ പ്രായം 18 ആയി ഉയർത്താൻ പദ്ധതിയിടുന്നതായി നേരത്തെ വ്യക്തമാക്കിയിരുന്നു.
ഇംഗ്ലണ്ടിൽ ശൈശവ വിവാഹത്തിന് എതിരെ പെയ്‌സി മഹമൂദിന്റെ നേതൃത്വത്തിൽ വർഷങ്ങളായി ക്യാംപയിൻ നടക്കുന്നുണ്ട്. ശൈശവ വിവാഹത്തെ അതിജീവിച്ചയാളാണ് പെയ്‌സി. ഇംഗ്ലണ്ടിലും വെയിൽസിലും പുതിയ നിയമം പ്രാബല്യത്തിൽ വരുന്നത് കാണുന്നത് എന്റെ ജീവിതത്തിലെ ഏറ്റവും പ്രധാനപ്പെട്ട ദിവസങ്ങളിലൊന്നായിരുന്നുവെന്ന് അവർ പറഞ്ഞു.
'ഇത് എന്നെ സംബന്ധിച്ചിടത്തോളം വളരെ വൈകാരികമാണ്. ശൈശവ വിവാഹത്തിന്റെ ദോഷങ്ങൾ എനിക്ക് വളരെ വിശദമായി അറിയാം. ഞാൻ വ്യക്തിപരമായി അതിലൂടെ കടന്നുപോയി. എന്റെ സഹോദരി അതിലൂടെ കടന്നുപോകുന്നത് ഞാൻ കണ്ടു. കൂടാതെ നിരവധി സ്ത്രീകൾക്കും പെൺകുട്ടികൾക്കും ഇത് ഉണ്ടാക്കുന്ന വിനാശകരമായ പ്രത്യാഘാതങ്ങൾ ഞാൻ കണ്ടിട്ടുണ്ട്. അവർ ശൈശവ വിവാഹങ്ങൾ ഉപേക്ഷിക്കാൻ ശ്രമിക്കുമ്പോൾ, ആത്യന്തികമായ ശിക്ഷ മരണമാണ്, എന്റെ സഹോദരിയുടെ കാര്യത്തിലും ഇതാണ് സംഭവിച്ചത്. ശൈശവവിവാഹത്തെ അഭിമുഖീകരിക്കുമ്പോൾ അവരുടെ മാതാപിതാക്കൾക്കോ അവരുടെ സമൂഹത്തിനോ എതിരെ സംസാരിക്കേണ്ട ബാധ്യത കുട്ടിയുടെ മേലല്ല എന്നാണ് മാറ്റങ്ങൾ അർത്ഥമാക്കുന്നതെന്ന് പെയ്‌സി പറഞ്ഞു.
