തിരുവനന്തപുരം- സര്‍ക്കാരിനെ വിമര്‍ശിക്കുന്ന തരത്തില്‍ കേരള കോണ്‍ഗ്രസ് (ബി) ചെയര്‍മാന്‍ കെ.ബി ഗണേഷ് കുമാര്‍ എം.എല്‍എ നടത്തിയ പരാമര്‍ശങ്ങള്‍ക്കെതിരെ മുഖ്യമന്ത്രി പിണറായി വിജയന്‍. എല്‍.ഡി.എഫ് നിയമസഭാ കക്ഷി യോഗത്തിലാണ് പിണറായി വിമര്‍ശനം ഉന്നയിച്ചത്. വാര്‍ത്തയാകുന്ന രീതിയിലല്ല പ്രശ്‌നങ്ങള്‍ ഉന്നയിക്കേണ്ടതെന്ന് മുഖ്യമന്ത്രി പറഞ്ഞു. ആ ശൈലി ശരിയല്ല. സര്‍ക്കാര്‍ പണം അനുവദിക്കാതെയാണോ ഗണേഷിന്റെ മണ്ഡലമായ പത്തനാപുരത്ത് വികസനം നടന്നതെന്നു മുഖ്യമന്ത്രി ചോദിച്ചു. പത്തനാപുരത്തിന് അനുവദിച്ച പദ്ധതികളുടെ കണക്കും മുഖ്യമന്ത്രി വായിച്ചു. ഗണേഷ് കുമാര്‍ യോഗത്തില്‍ പങ്കെടുത്തില്ല.
നേരത്തെ, നിയമസഭാസമ്മേളനം തുടങ്ങുന്നതിനു മുന്നോടിയായി നടന്ന എല്‍.ഡി.എഫ് നിയമസഭാകക്ഷി യോഗത്തില്‍ ഗണേഷ് കുമാര്‍ പത്തനാപുരത്ത് വികസനമെത്തുന്നില്ലെന്ന് പരാതി ഉന്നയിച്ചിരുന്നു. ഭരണപക്ഷ എം.എല്‍.എമാരെപ്പോലും സര്‍ക്കാര്‍ അവഗണിക്കുകയാണെന്നാണ് ഗണേഷ് തുറന്നടിച്ചത്. തുറന്നുപറയുന്നതിന്റെ പേരില്‍ നടപടി എടുക്കാനാണെങ്കില്‍ അതു ചെയ്‌തോളൂ എന്ന വെല്ലുവിളിയുമായി ഗണേഷ് വേദി വിടുകയും ചെയ്തു. അന്ന് മുഖ്യമന്ത്രി യോഗത്തില്‍ ഉണ്ടായിരുന്നില്ല.
