കോഴിക്കോട് - കരിപ്പൂരിൽ ഒരു കോടി രൂപയുടെ സ്വർണവുമായി 19-കാരി പിടിയിൽ. ദുബൈയിൽ നിന്നെത്തിയ കാസർകോട് സ്വദേശി ഷഹലയാണ് അറസ്റ്റിലായത്. യുവതിയിൽ നിന്നും 1884 ഗ്രാം സ്വർണമാണ് പിടികൂടിയത്. അടിവസ്ത്രത്തിൽ തുന്നിച്ചേർത്താണ് സ്വർണം കടത്താൻ ശ്രമിച്ചത്.
കസ്റ്റംസ് പരിശോധന പൂർത്തിയാക്കി പുറത്തിറങ്ങിയപ്പോൾ വിമാനത്താവളത്തിന് പുറത്തു വെച്ചാണ് യുവതിയെ പോലീസ് പിടികൂടിയത്. ഇന്നലെ (ഞായർ) രാത്രി 10.30ന് എയർ ഇന്ത്യ എക്‌സ്പ്രസിലാണ് യുവതി എത്തിയത്.
ജില്ലാ പോലീസ് മേധാവിക്ക് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് പോലീസ് യുവതിയെ കസ്റ്റഡിയിലെടുത്ത്‌ പരിശോധനയ്ക്ക് വിധേയമാക്കിയത്. സ്വർണക്കടത്തുകാരുമായി തനിക്ക് ബന്ധമില്ലെന്ന് പറഞ്ഞ യുവതിയെ മണിക്കൂറുകൾ ചോദ്യം ചെയ്തിട്ടും പോലീസിന് ഒന്നും ലഭിച്ചില്ല. ശേഷം ലഗേജുകളും വിശദമായി പരിശോധിച്ചു. പിന്നാലെ ദേഹപരിശോധന നടത്തിയപ്പോൾ അടിവസ്ത്രത്തിൽ മൂന്നു പാക്കറ്റുകളിലായി വിദഗ്ധമായി തുന്നിച്ചേർത്ത നിലയിലായിരുന്നു സ്വർണമെന്ന് ഉദ്യോഗസ്ഥർ പറഞ്ഞു. കരിപ്പൂർ വിമാനത്താവളത്തിന് പുറത്തുവച്ച് പോലീസ് പിടികൂടുന്ന 87-മത്തെ സ്വർണക്കടത്ത് കേസാണിതെന്ന് പോലീസ് പറഞ്ഞു.
