ദിലീപ് അരുണ് ഗോപി ചിത്രമായ ബാന്ദ്ര'യിലെ പുതിയ പോസ്റ്റര് പുറത്തുവിട്ട് അണിയറപ്രവര്ത്തകര്. ക്രിസ്മസ് ആശംസകള് നേര്ന്നുകൊണ്ട് പുറത്തുവിട്ട പോസ്റ്ററില് മലയാളി അച്ചായത്തി ലുക്കിലാണ് തെന്നിന്ത്യന് താര റാണി തമന്ന.
രാമലീല'യ്ക്ക് ശേഷം ദിലീപിനെ നായകനാക്കി അരുണ് ഗോപി ഒരുക്കുന്ന ബിഗ് ബജറ്റ് ചിത്രമാണ് ബാന്ദ്ര. അണ്ടര്വേള്ഡ് ഡോണ് ആയാണ് ചിത്രത്തില് ദിലീപ് പ്രത്യക്ഷപ്പെടുന്നത്. മുംബെയില് നടന്ന ഒരു യഥാര്ഥ സംഭവത്തെ ആസ്പദമാക്കിയാണ് ചിത്രം. തില്ലര് മൂഡില് അണിയിച്ചൊരുക്കുന്ന ബാന്ദ്ര സമീപകാലത്തെ ഏറ്റവും മുതല് മുടക്കുള്ള സിനിമകളില് ഒന്നാണ്. ശരത് കുമാര്, ഈശ്വരി റാവു, വിടിവി ഗണേഷ്, ഡിനോ മോറിയ, ആര്യന് സന്തോഷ്, സിദ്ദീഖ്, ലെന, കലാഭവന് ഷാജോണ് തുടങ്ങി വന് താരനിരയുണ്ട് ചിത്രത്തില്.
ഉദയകൃഷ്ണയാണ് ചിത്രത്തിന് തിരക്കഥയൊരുക്കുന്നത്. അജിത്ത് വിനായക ഫിലിംസിന്റെ ബാനറില് വിനായക അജിത്ത് ആണ് ചിത്രത്തിന്റെ നിര്മ്മാണം. ഷാജി കുമാര് ഛായാഗ്രഹണം. സംഗീതം സാം സി.എസ്, എഡിറ്റിങ് വിവേക് ഹര്ഷന്, പ്രൊഡക്ഷന് ഡിസൈനര് നോബിള് ജേക്കബ്.
