തിരുവനന്തപുരം- മറ്റ് രാജ്യങ്ങളില് കോവിഡ് രോഗബാധ വര്ധിച്ചുവരുന്ന സാഹചര്യത്തില് സ്റ്റേറ്റ് കോവിഡ് മോണിറ്ററിംഗ് സെല്ലിന്റെ പ്രവര്ത്തനം ഒരിടവേളക്ക് ശേഷം പുനരാരംഭിച്ചതായി ആരോഗ്യ മന്ത്രി വീണാ ജോര്ജ്. ആശുപത്രി ഉപയോഗം, രോഗനിര്ണയ നിരക്ക്, മരണനിരക്ക് എന്നിവ നിരീക്ഷിക്കുകയും അവബോധം ശക്തിപ്പെടുത്തുകയുമാണ് ലക്ഷ്യം.
കോവിഡ് കേസുകളുടെ വര്ധനവിന്റെ നിരക്കനുസരിച്ച് പ്രവര്ത്തനങ്ങള് വിപുലപ്പെടുത്തും. വിമാനത്താവളങ്ങളിലും സീപോര്ട്ടിലും നിരീക്ഷണം ശക്തമാക്കും. കേന്ദ്ര നിര്ദേശ പ്രകാരം വിദേശത്തുനിന്ന് വരുന്ന രണ്ട് ശതമാനം പേരുടെ സാമ്പിളുകള് പരിശോധിക്കുമെന്നും മന്ത്രി പറഞ്ഞു. ജില്ലകളുടെ അവലോകന യോഗത്തില് സംസാരിക്കുകയായിരുന്നു മന്ത്രി.
ജില്ലകള് സ്വീകരിച്ചതും സ്വീകരിക്കേണ്ടതുമായ പ്രവര്ത്തനങ്ങള് യോഗം ചര്ച്ചചെയ്തു. സംസ്ഥാനത്ത് നിലവില് കോവിഡ് കേസുകള് വളരെ കുറവാണ്. രണ്ടാഴ്ചയിലെ കണക്കെടുത്താല് പ്രതിദിന കേസുകള് 100 ന് താഴെ മാത്രമാണ്. ആശുപത്രികളില് ചികിത്സയിലുള്ള രോഗികളും വളരെ കുറവാണ്. പുതിയ വകഭേദങ്ങളെ നിരീക്ഷിക്കാനായി ജനിതക ശ്രേണീകരണം കൂടുതല് ശക്തിപ്പെടുത്തും. എയര്പോര്ട്ടുകളിലും സീപോര്ട്ടിലും ആര്ക്കെങ്കിലും കോവിഡ് പോസിറ്റീവായാല് ആ സാമ്പിളുകള് ജനിതക ശ്രേണീകരണത്തിന് അയക്കും.
