കൊച്ചി- അനാശാസ്യ പ്രവര്ത്തന നിരോധന ആക്ട് പ്രകാരമുള്ള കുറ്റം അനാശാസ്യകേന്ദ്രത്തില് എത്തുന്ന ഇടപാടുകാരനും ബാധകമാണെന്ന് ഹൈക്കോടതി. ആവശ്യക്കാര് പരിധിയില് വന്നില്ലെങ്കില് നിയമത്തിന്റെ ഉദ്ദേശ്യം തന്നെ പരാജയപ്പെടുമെന്ന് നിരീക്ഷിച്ചാണ് ജസ്റ്റിസ് ബെച്ചു കുര്യന് തോമസ് ഉത്തരവിറക്കിയത്.
എറണാകുളം രവിപുരത്ത് ആയുര്വേദ ആശുപത്രിയുടെ മറവില് നടത്തിയ അനാശാസ്യ കേന്ദ്രത്തില് വെച്ച് പിടിയിലായ മൂവാറ്റുപുഴ സ്വദേശി കേസ് റദ്ദാക്കണമെന്നാവശ്യപ്പെട്ട് നല്കിയ ഹരജിയാണ് കോടതി തള്ളിയത്. 2007ല് ഹരജിക്കാരനെതിരേ രജിസ്റ്റര് ചെയ്ത കേസ് റദ്ദാക്കണമെന്നാണ് ആവശ്യം. അനാശാസ്യ പ്രവര്ത്തന നിരോധന നിയമ പ്രകാരമുള്ള കുറ്റം ഇടപാടുകാരനായ തനിക്കെതിരെ നിലനില്ക്കില്ലെന്നാണ് ഹരജിക്കാരന് വാദിച്ചത്. ഇടപാടുകാരന്(കസ്റ്റമര്) എന്ന പദം നിയമത്തില് പ്രത്യേകമായി പരാമര്ശിച്ചിട്ടില്ലെന്ന് അദ്ദേഹം ചൂണ്ടിക്കാട്ടി. എന്നാല് ഈ വാദം കോടതി തള്ളി. കസ്റ്റമറും നിയമത്തില് പരാമര്ശിച്ചിട്ടുള്ള വ്യക്തി യുടെ പരിധിയില് വരുമെന്ന് കോടതി നിരീക്ഷിച്ചു. ലൈംഗിക ചൂഷണം എന്നത് സ്വന്തമായി ചെയ്യാവുന്ന ഒരു പ്രവൃത്തിയല്ല. കസ്റ്റമര് ഇല്ലാതെ അനാശാസ്യം നടക്കുകയില്ല. കസ്റ്റമറും നിയമത്തിന്റെ പരിധിയില് വരുമെന്ന് തന്നെയാണ് നിയമനിര്മാണ സമിതി ഉദ്ദേശിച്ചതെന്നും കോടതി വിലയിരുത്തി.
