മഞ്ചേരി- അധ്യാപിക തൂങ്ങിമരിച്ച സംഭവത്തില്‍ പ്രതിയായ സഹപ്രവര്‍ത്തകന്റെ ജാമ്യാപേക്ഷ മഞ്ചേരി ജില്ലാ സെഷന്‍സ് കോടതി തള്ളി. കോഴിക്കോട് പയ്യോളി പള്ളിക്കര മഠത്തില്‍ രാംദാസി (44) ന്റെ ജാമ്യാപേക്ഷയാണ് ജഡ്ജി എസ്. മുരളീകൃഷ്ണ തള്ളിയത്. കോഴിക്കോട് കുനിയില്‍ വീട്ടില്‍ ഉണ്ണികൃഷ്ണന്റെ മകള്‍ ടി. ബൈജു ടീച്ചറാണ് മരിച്ചത്. 2022 സെപ്റ്റംബര്‍ 17നാണ് സംഭവം. അധ്യാപിക താമസിച്ചു വന്നിരുന്ന വേങ്ങര കണ്ണമംഗലം എടക്കാപറമ്പിലെ ശ്രീരാഗം വീട്ടില്‍ കിടപ്പുമുറിയിലെ ഫാനില്‍ തൂങ്ങിമരിച്ച നിലയിലാണ് കണ്ടെത്തിയത്. പോലീസ് നടത്തിയ അന്വേഷണത്തില്‍ സംഭവസ്ഥലത്തുനിന്നു അധ്യാപികയുടെ ഡയറി, നോട്ടുബുക്കുകള്‍, ഫോണുകള്‍ എന്നിവ കണ്ടെത്തിയിരുന്നു. ഇവ കേന്ദ്രീകരിച്ച് നടന്ന അന്വേഷണത്തിലാണ് ഇക്കഴിഞ്ഞ 23ന് അധ്യാപകനായ പ്രതി അറസ്റ്റിലാകുന്നത്. നവംബര്‍ 25ന് പ്രതിയെ കസ്റ്റഡിയില്‍ വാങ്ങി നടത്തിയ അന്വേഷണത്തില്‍ ഇരുവരും പാലക്കാട് നെല്ലിയാമ്പതിയില്‍ താമസിച്ച ഹോട്ടല്‍ രേഖകളും കണ്ടെടുത്തിരുന്നു. സഹപ്രവര്‍ത്തകയെ പ്രലോഭിപ്പിച്ച് പലയിടങ്ങളിലും കൊണ്ടുപോയി താമസിപ്പിക്കുകയും ആത്മഹത്യാ പ്രേരണ നടത്തുകയും ചെയ്തുവെന്നുമാണ് പ്രതിക്കെതിരെയുള്ള കേസ്.
