മലപ്പുറം- ആഡംബര കാറിൽ തിയറ്ററിലെത്തിയ ആൾ കൂടെയുള്ള ബാലികയെ ക്രൂരമായി ലൈംഗിക പീഡനം നടത്തുന്ന സിസിടിവി ദൃശ്യങ്ങൾ പുറത്തു വന്നു. ഇയാൾക്കൊപ്പം ഒരു സ്ത്രീയും ഉണ്ട്. സ്ത്രീയിലും ഇയാൾ ലൈംഗിക ചേഷ്ടകൾ കാണിക്കുന്നുണ്ട്. ഏപ്രിൽ 18ന് എടപ്പാളിലെ ഒരു തിയറ്ററിലാണ് സംഭവം നടന്നത്. സംഭവത്തിന്റെ ഗൗരവം ബോധ്യപ്പെട്ട തിയറ്റർ ഉടമ ദൃശ്യം സഹിതം ചൈൽഡ്‌ലൈൻ അധികൃതരെ അറിയിക്കുകയായിരുന്നു. ഏപ്രിൽ 25നാണ് ചൈൽഡ് ലൈൻ പരാതി ലഭിച്ചത്. സംഭവം ചൈൽഡ് ലൈൻ ചങ്ങരംകുളം പോലീസിനെയും അറിയിച്ചിരുന്നു. ഇതുവരെ ദൃശ്യങ്ങളിൽ ഉള്ളവരെ തിരിച്ചറിയാനായിട്ടില്ല. പോലീസ് കേസ് രജിസ്റ്റര്‍ ചെയ്തു.
കെ എൽ 46 ജി 240 എന്ന രജിസ്‌ട്രേഷൻ നമ്പറുള്ള മെഴ്‌സീഡിസ് ബെൻസ് കാറിലാണ് മധ്യവയസ്‌ക്കൻ 40 വയസ്സ് പ്രായം തോന്നിക്കുന്ന സ്ത്രീക്കും 10 വയസ്സിൽ താഴെ പ്രായം തോന്നിക്കുന്ന ബാലികയ്ക്കും ഒപ്പം തീയെറ്ററിലെത്തിയത്. രാത്രി ഷോയ്‌ക്കെത്തിയ ഇയാൾ സ്ത്രീയേയും പെൺകുട്ടിയേയും വശങ്ങളിലായി ഇരുത്തി ലൈംഗികമായി ഉപദ്രവിക്കുന്നതാണ് ദൃശ്യങ്ങളിലുള്ളത്. കുട്ടിയെ പീഡിപ്പിക്കുന്നത് സ്ത്രീ അറിയുന്നുണ്ടെങ്കിലും പ്രതികരിക്കുന്നില്ലെന്നും ദൃശ്യങ്ങളിൽ നിന്ന് വ്യക്തമാണ്.
മൊയ്തീൻ കുട്ടി എന്നയാളുടെ പേരിൽ രജിസ്റ്റർ ചെയ്തതാണ് ഈ ആഡംബര കാർ എന്നു വ്യക്തമായിട്ടുണ്ട്. എന്നാൽ ഇദ്ദേഹം തന്നെയാണോ ദൃശ്യങ്ങളിലുള്ളതെന്ന് സ്ഥിരീകരിച്ചിട്ടില്ല. അതേസമയം ഫേസ്ബുക്കിൽ ഇയാളോട് രൂപസാദൃശ്യമുള്ള മൊയ്തീൻ കുട്ടി എന്ന പേരിലുള്ള ഒരു അക്കൗണ്ട് ഉണ്ടായിരുന്നു. വാർത്ത മാതൃഭൂമി ന്യൂസ് പുറത്തു വിട്ടതോടെ ഈ ഫേസ്ബുക്ക് അക്കൗണ്ടിലെ ചിത്രങ്ങൾ നീക്കം ചെയ്യപ്പെട്ടിട്ടുണ്ട്.
