Sorry, you need to enable JavaScript to visit this website.
Monday , November   28, 2022
Monday , November   28, 2022

ആഗോളതലത്തില്‍ ഇന്ത്യന്‍ സമ്പദ് വ്യവസ്ഥ അതിവേഗം വളരുന്നെന്ന് ഒ. ഇ. സി. ഡി

ന്യൂദല്‍ഹി- ആഗോള തലത്തില്‍ മാന്ദ്യം നേരിടുമ്പോഴും ആഗോള തലത്തില്‍ അതിവേഗം വളരുന്ന സമ്പദ് വ്യവസ്ഥകളിലൊന്നാണ് ഇന്ത്യയെന്ന് പാരീസ് ആസ്ഥാനമായുള്ള ഇന്റര്‍ ഗവണ്‍മെന്റല്‍ ബോഡിയായ ഓര്‍ഗനൈസേഷന്‍ ഫോര്‍ ഇക്കണോമിക് കോഓപ്പറേഷന്‍ ആന്‍ഡ് ഡെവലപ്‌മെന്റ് (ഒ. ഇ. സി. ഡി). ഈ സാമ്പത്തിക വര്‍ഷത്തില്‍ 6.6 ശതമാനം വളര്‍ച്ചാ നിരക്കാണ് ഇന്ത്യ രേഖപ്പെടുത്തിയത്. റഷ്യ- യുക്രെയ്ന്‍ സംഘര്‍ഷം ഊര്‍ജ്ജ ആഘാതം സൃഷ്ടിക്കുന്ന ആഗോള മാന്ദ്യത്തിനിടയിലും ഇന്ത്യ വളരുകയാണെന്നും ഒ. ഇ. സി. ഡി കൂട്ടിച്ചേര്‍ത്തു. 

2022- 23 സാമ്പത്തിക വര്‍ഷത്തില്‍ ജി20ല്‍ അതിവേഗം വളരുന്ന രണ്ടാമത്തെ സമ്പദ് വ്യവസ്ഥയായി ഇന്ത്യ മാറുമെന്ന് ഏറ്റവും പുതിയ 'ഇക്കണോമിക് ഔട്ട്‌ലുക്കിലെ' സാമ്പത്തിക നയ റിപ്പോര്‍ട്ടില്‍ ശ്രദ്ധ കേന്ദ്രീകരിക്കുന്ന ഒ. ഇ. സി. ഡി പറയുന്നു. ആഗോള ഡിമാന്‍ഡ് കുറയുകയും പണപ്പെരുപ്പ സമ്മര്‍ദങ്ങള്‍ നിയന്ത്രിക്കുന്നതിനുള്ള പണനയം കര്‍ശനമാക്കുകയും ചെയ്ത്  സൗദി അറേബ്യക്ക് പിന്നില്‍ രണ്ടാമതായിരിക്കും ഇന്ത്യയെന്നാണ് റിപ്പോര്‍ട്ട് പറയുന്നത്. 

കയറ്റുമതിയും ആഭ്യന്തര ഡിമാന്‍ഡ് വളര്‍ച്ചയും മിതമായതിനാല്‍ 2023- 24 സാമ്പത്തിക വര്‍ഷത്തില്‍ രാജ്യത്തെ ജി. ഡി. പി വളര്‍ച്ച 5.7 ശതമാനമായി കുറയും. എന്നാല്‍ ചൈനയും സൗദി അറേബ്യയും ഉള്‍പ്പെടെയുള്ള മറ്റ് പല ജി 20 സമ്പദ് വ്യവസ്ഥകളേക്കാളും ഇത് വളരുമെന്നാണ് അര്‍ഥമാക്കുന്നത്. 

2022- 23 സാമ്പത്തിക വര്‍ഷത്തില്‍ 6.6 ശതമാനത്തിലെത്തിയ ശേഷം ജി. ഡി. പി വളര്‍ച്ച 2023-24 സാമ്പത്തിക വര്‍ഷത്തില്‍ 5.7 ശതമാനമായി കുറയുമെന്നും 2024- 25 സാമ്പത്തിക വര്‍ഷത്തില്‍ ഇത് ഏഴ് ശതമാനമായി മാറുമെന്നും റിപ്പോര്‍ട്ടില്‍ പറയുന്നു.

2023-ലെ വളര്‍ച്ച പ്രധാന ഏഷ്യന്‍ വിപണി സമ്പദ് വ്യവസ്ഥയെ ശക്തമായി ആശ്രയിച്ചിരിക്കുന്നു. അടുത്ത വര്‍ഷം ആഗോള ജി. ഡി. പി വളര്‍ച്ചയുടെ മുക്കാല്‍ ഭാഗത്തോളം വരുമ്പോള്‍ യു. എസും യൂറോപ്പും കുത്തനെ ഇടിയുന്ന അവസ്ഥയിലായിരിക്കും.

സി. പി. ഐ പണപ്പെരുപ്പം സെന്‍ട്രല്‍ ബാങ്കിന്റെ ഉയര്‍ന്ന പരിധിയായ ആറു ശതമാനത്തിന് മുകളില്‍ 2023ന്റെ തുടക്കം വരെ തുടരും. തുടര്‍ന്ന് ഉയര്‍ന്ന പലിശ നിരക്ക് പ്രാബല്യത്തില്‍ വരുന്നതോടെ ക്രമേണ കുറയും. അതിര്‍ത്തികള്‍ പൂര്‍ണ്ണമായി തുറന്ന് നിയന്ത്രണങ്ങള്‍ നീക്കിക്കഴിഞ്ഞാല്‍ അന്താരാഷ്ട്ര ടൂറിസം ഉള്‍പ്പെടെ കൂടുതല്‍ സമ്പര്‍ക്ക- ഇന്റന്‍സീവ് സേവന മേഖലകള്‍ സാധാരണ നിലയിലാകുമ്പോള്‍ ഈ ശക്തികളിലൂടെ ഭാഗികമായെങ്കിലും ചില മെച്ചപ്പെടുത്തലുകള്‍ പ്രതീക്ഷിക്കാമെന്നും റിപ്പോര്‍ട്ട് അഭിപ്രായപ്പെടുന്നു. 

രാജ്യത്തിന്റെ ഐ. സി. ടി, യൂണിഫൈഡ് പേയ്‌മെന്റ് ഇന്റര്‍ഫേസ് (യു. പി. ഐ) എന്നിവയിലെ മത്സര ശക്തിയെ പ്രയോജനപ്പെടുത്തി പിന്നാക്കം നില്‍ക്കുന്ന സാമൂഹിക- സാമ്പത്തിക ഗ്രൂപ്പുകള്‍ ഉള്‍പ്പെടെ ജനസംഖ്യയുടെ വലിയൊരു വിഭാഗത്തിന് സാമ്പത്തിക സേവനങ്ങളിലേക്കുള്ള പ്രവേശനം വിപുലീകരിക്കുന്നതില്‍ സമീപ വര്‍ഷങ്ങളിലെ ഇന്ത്യയുടെ മികച്ച പുരോഗതി ഒ. ഇ. സി. ഡി എടുത്തുകാണിക്കുന്നു.

Latest News