ന്യൂദല്‍ഹി- അനധികൃതമായി ഒരു പേഴ്‌സണല്‍ സ്റ്റാഫിനെ പോലും താന്‍ നിയമിച്ചിട്ടില്ലെന്ന് ഗവര്‍ണര്‍ ആരിഫ് മുഹമ്മദ് ഖാന്‍. രാജ്ഭവനിലെ നിയമനങ്ങളില്‍ ഇടപെടാറില്ലെന്നും മുന്‍വര്‍ഷങ്ങളിലുള്ള അതേ പേഴ്‌സണല്‍ സ്റ്റാഫ് മാത്രമാണ് ഇപ്പോഴുമുള്ളതെന്ന് അദ്ദേഹം പറഞ്ഞു.
കൂടുതലായി ഒരു സൗകര്യവും ആവശ്യപ്പെട്ടിട്ടില്ലെന്ന് ഗവര്‍ണര്‍ മാധ്യമങ്ങളോട് പറഞ്ഞു. റോഡില്‍ ഓടിക്കാന്‍ കൊള്ളാത്ത കാര്‍ മാറ്റിത്തരണമെന്ന് പോലും ആവശ്യപ്പെട്ടില്ലെന്ന് അദ്ദേഹം കൂട്ടിച്ചേര്‍ത്തു. മന്ത്രിയുടെ പേഴ്‌സണല്‍ സ്റ്റാഫ് വിഷയമാണ് ഇനി താന്‍ ഏറ്റെടുക്കുന്നതെന്ന് ഗവര്‍ണര്‍ കഴിഞ്ഞ ദിവസം വ്യക്തമാക്കിയിരുന്നു.
കണ്ണൂര്‍ യൂണിവേഴ്‌സിറ്റിയിലെ അസോസിയേറ്റ് പ്രൊഫസറായി പ്രിയ വര്‍ഗീസിനെ നിയമിക്കാന്‍ ശ്രമിച്ചതില്‍ മുഖ്യമന്ത്രി പിണറായി വിജയന് പങ്കുണ്ടെന്ന പ്രസ്താവനയില്‍ ഉറച്ചുനില്‍ക്കുന്നുവെന്നും, സര്‍ക്കാരിന്റെ പൊതുരീതിയാണ് ഇതെന്നുവേണം മനസ്സിലാക്കാനെന്നും ഗവര്‍ണര്‍ പറഞ്ഞു.
