കൊച്ചി - മോഡലിനെ കാറിൽ വച്ച് കൂട്ടബലാത്സംഗം ചെയ്ത സംഭവത്തിൽ ഒരു സ്ത്രീയും മൂന്നു യുവാക്കളും ഉൾപ്പെടെ നാലുപേർ അറസ്റ്റിൽ. കൊച്ചിയിൽ ഇന്നലെ രാത്രി 11-ഓടെയാണ് സംഭവം. അറസ്റ്റിലായ യുവാക്കൾ കൊടുങ്ങല്ലൂർ സ്വദേശികളാണ്.
ബലാത്സംഗം ചെയ്തതിന് ശേഷം 19-കാരിയായ മോഡലിനെ കാക്കനാട്ടുള്ള താമസസ്ഥലത്ത് ഇറക്കിവിടുകയായിരുന്നു. ഇവരുടെ സുഹൃത്താണ് സംഭവം പോലീസിൽ അറിയിച്ചത്. ബാറിൽ മദ്യപിക്കുന്നതിനിടെ കുഴഞ്ഞുവീണ യുവതിയെ കാക്കനാട്ടുള്ള വീട്ടിലെത്തിക്കാമെന്നും പറഞ്ഞ് കൊണ്ടുപോകുന്നതിനിടെയായിരുന്നു പീഡനം. യുവതി മലയാളിയല്ല.
സുഹൃത്തായ യുവതി കാറിൽ കയറാൻ കൂട്ടാക്കിയിരുന്നില്ല. നിർബന്ധപൂർവം കയറ്റുകയായിരുന്നു. തുടർന്ന് നഗരത്തിന്റെ വിവിധ ഭാഗങ്ങളിൽ കറങ്ങിയ യുവാക്കൾ കാറിൽ വച്ച് മാറി മാറി യുവതിയെ ബലാത്സംഗം ചെയ്യുകയും ഒടുവിൽ കാക്കനാട്ടെ അവരുടെ താമസസ്ഥലത്ത് ഇറക്കി വിടുകയുമായിരുന്നു. യുവതിയെ ചികിത്സയ്ക്കായി കളമശ്ശേരി മെഡിക്കൽ കോളേജിൽ പ്രവേശിപ്പിച്ചിരിക്കുകയാണ്. ബാറിലെത്തിയ യുവാക്കൾ അവിടെ നൽകിയ തിരിച്ചറിയൽ രേഖകൾ വ്യാജമാണെന്ന് കണ്ടെത്തിയതായി പോലീസ് വ്യക്തമാക്കി.
