ന്യൂദല്‍ഹി- ജി മെയിലില്‍ പഴയ ഡിസൈന്‍ ഉപയോഗിക്കാന്‍ നല്‍കിയിരുന്ന സൗകര്യം ഒഴിവാക്കുന്നു. ജിമെയിലില്‍ പുതിയ പരിഷ്‌കാരങ്ങള്‍ വരുത്തിയിരിക്കുകയാണ് ഗൂഗിള്‍. ഉപയോക്താക്കള്‍ക്ക് സൗകര്യപ്രദമായ രീതിയിലേക്ക് ജിമെയിലിന്റെ ഇന്റര്‍ഫെയ്‌സ് മാറ്റിയാണ് പുതിയ തീരുമാനം. ഈ വര്‍ഷം ആദ്യംതന്നെ പുതിയ ലേ ഔട്ടിലേക്ക് ജിമെയിലിനെ മാറ്റിയിരുന്നുവെങ്കിലും പഴയ ഡിസൈന്‍ ഉപയോഗിക്കാനുള്ള സൗകര്യം ജിമെയില്‍ നല്‍കിയിരുന്നു. എന്നാല്‍ ഈ മാസം മുതല്‍ പഴയ രൂപത്തിലേക്ക് മാറാന്‍ കഴിയില്ല.
ഈ വര്‍ഷം ഫെബ്രുവരിയിലാണ് പരീക്ഷണാടിസ്ഥാനത്തില്‍ ജിമെയില്‍ പുതിയ രൂപത്തിലേക്ക് മാറ്റിയത്. ഏപ്രിലോടെ ഇത് കൂടുതല്‍ ആളുകളിലേക്ക് എത്തിച്ചു. പുതിയ ഡിസൈന്‍ ഇഷ്ടപ്പെടാത്ത ഉപഭോക്താക്കള്‍ക്ക് വേണ്ടിയാണ് പഴയ ഡിസൈന്‍ തന്നെ ഉപയോഗിക്കാനുള്ള ഒപ്ഷന്‍ നല്‍കിയത്.
ജിമെയില്‍ തുറന്നാല്‍ ഇടതുഭാഗത്ത് ജിമെയില്‍, ചാറ്റ്, സ്‌പെയ്‌സസ്, മീറ്റ് എന്നിവ കാണാനാവുന്ന വിധത്തിലാണ് പുതിയ ക്രമീകരണങ്ങള്‍. ഇതുവഴി ജിമെയിലിന്റെ ഉപ സംവിധാനങ്ങളായ ഗൂഗിള്‍ മീറ്റ്, ഗൂഗിള്‍ ചാറ്റ് ഉള്‍പ്പെടെയുള്ള സൗകര്യങ്ങള്‍ വളരെപ്പെട്ടെന്നുതന്നെ ഉപയോഗിക്കാന്‍ കഴിയും.
ചാറ്റ് ഓണ്‍ ആക്കിയ ഉപഭോക്താക്കളുടെ ജിമെയില്‍ വിന്‍ഡോയില്‍ ഇടത് വശത്തായി ജിമെയില്‍, ചാറ്റ്, സ്‌പേസസ്, മീറ്റ് എന്നീ ബട്ടനുകള്‍ നല്‍കിക്കൊണ്ടാണ് പുതിയ ഡിസൈന്‍. ഈ ഓപ്ഷനുകളില്‍ ഉപഭോക്താവിന് പ്രാധാനപ്പെട്ടവ നിലനിര്‍ത്താനും എളുപ്പം ഉപയോഗിക്കാനും സാധിക്കും.
