റിയാദ് - ബിനാമി ബിസിനസുകള്‍ നടത്തുന്നവര്‍ ബന്ധപ്പെട്ട വകുപ്പുകള്‍ അത്തരം സ്ഥാപനങ്ങള്‍ കണ്ടെത്തുന്നതിനു മുമ്പായി അതേ കുറിച്ച് സ്വയം വിവരം നല്‍കാന്‍ മുന്നോട്ടുവന്നാല്‍ നിയമം അനുശാസിക്കുന്ന ശിക്ഷകളില്‍ നിന്ന് അവര്‍ ഒഴിവാക്കപ്പെടുമെന്ന് പബ്ലിക് പ്രോസിക്യൂഷന്‍ പറഞ്ഞു.
ബിനാമി ബിസിനസ് വിരുദ്ധ നിയമത്തില്‍ പ്രതിപാദിക്കുന്ന കുറ്റകൃത്യങ്ങള്‍ ചെയ്യുന്നവര്‍ അത്തരം സ്ഥാപനങ്ങള്‍ കണ്ടെത്തുന്നതിനു മുമ്പായി അതേ കുറിച്ചും ബിനാമി ബിസിനസ് നടത്തുന്ന മറ്റുള്ളവരെ കുറിച്ചും റിപ്പോര്‍ട്ട് ചെയ്യുകയും ഇത് നിയമ ലംഘകര്‍ പിടിയിലാകാനും ബിനാമി ബിസിനസിലൂടെ സമ്പാദിച്ച പണവും മറ്റു സമ്പാദ്യങ്ങളും പിടികൂടാനും ഇടയാക്കുകയും ചെയ്യുന്ന പക്ഷം തടവ് ശിക്ഷയില്‍ നിന്നും പിഴയില്‍ നിന്നും ഒഴിവാക്കപ്പെടുമെന്ന് പബ്ലിക് പ്രോസിക്യൂഷന്‍ ട്വിറ്റര്‍ അക്കൗണ്ടിലൂടെ പറഞ്ഞു. ഇത്തരക്കാര്‍ സകാത്ത്, നികുതി ബാധ്യകളില്‍ നിന്ന് ഒഴിവാക്കപ്പെടില്ല. ബിനാമി ബിസിനസ് കേസിലെ കുറ്റക്കാര്‍ക്ക് അഞ്ചു വര്‍ഷം വരെ തടവും 50 ലക്ഷം റിയാല്‍ വരെ പിഴയും ശിക്ഷ ലഭിക്കുമെന്നും പബ്ലിക് പ്രോസിക്യൂഷന്‍ പറഞ്ഞു.
