കോട്ടയം- മുന്നോക്ക സംവരണം ശരിവെച്ചുള്ള സുപ്രീം കോടതി വിധി സ്വാഗതം ചെയ്ത് എന്‍.എസ്.എസ് ജനറല്‍ സെക്രട്ടറി ജി സുകുമാരന്‍ നായര്‍. വിധി എന്‍.എസ്.എസ് നിലപാട് ശരിവെക്കുന്നതാണ്. സാമ്പത്തിക അടിസ്ഥാനത്തില്‍ എല്ലാവര്‍ക്കും സംവരണമെന്നതാണ് എന്‍.എസ്.എസ് നിലപൊടെന്നും സുകുമാരന്‍ നായര്‍ പറഞ്ഞു. അതേസമയം പഠിച്ച ശേഷം പ്രതികരിക്കാമെന്ന് എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ പറഞ്ഞു.
'ജാതി സംവരണം അവസാനിപ്പിക്കേണ്ടതാണ്. പാവപ്പെട്ടവര്‍ക്ക് ഒന്നും ലഭിക്കുന്നില്ല. ജാതിയുടെ പേരില്‍ സംവരണം ലഭിക്കുന്നത് സാമ്പത്തികമായി മുന്നില്‍ നില്‍ക്കുന്നവര്‍ക്കാണ്. നായര്‍ സമുദായത്തിന് മാത്രമല്ല, മുഴുവന്‍ ആളുകള്‍ക്കും സംവരണം വേണമെന്നാണ് എന്‍.എസ്.എസ് ആവശ്യപ്പെടുന്നത്. സാമ്പത്തിക അടിസ്ഥാനത്തിലായിരിക്കണം സംവരണം നല്‍കേണ്ടത്. ഇത് സാമൂഹിക നീതിയുടെ വിജയമാണ്. സുപ്രീം കോടതി വിധി സ്വാഗതം ചെയ്യുന്നു', സുകുമാരന്‍ നായര്‍ പറഞ്ഞു.
മുന്നോക്ക വിഭാഗങ്ങളിലെ സാമ്പത്തികമായി പിന്നാക്കം നില്‍ക്കുന്നവര്‍ക്ക് 10 ശതമാനം സംവരണം ഏര്‍പ്പെടുത്തിയ ഭരണഘടനാ ഭേദഗതിയാണ് സുപ്രീംകോടതി ശരിവെച്ചത്. ചീഫ് ജസ്റ്റിസ് യു.യു ലളിത് അദ്ധ്യക്ഷനായ ബെഞ്ചാണ് വിധി പറഞ്ഞത്. അഞ്ചംഗ ഭരണഘടനാ ബെഞ്ചിലെ മൂന്ന് പേരും സംവരണം ശരിവെച്ചു.
