റിയാദ്- പനി ബാധിച്ച് അവശനിലയില് റിയാദില് കഴിയുന്നതിനിടെ സാമൂഹികപ്രവര്ത്തകര് ഇടപെട്ട് നാട്ടിലെത്തിച്ച് ആശുപത്രിയില് പ്രവേശിപ്പിച്ചിരുന്ന കോട്ടയം സ്വദേശി മരിച്ചു.റിയാദ് ഗവര്ണര് ഓഫീസിലെ മെയിന്റനന്സ് ഡിവിഷനില് പമ്പ് ഓപറേറ്ററായി ജോലി ചെയ്തിരുന്ന കൊല്ലം കരുനാഗപ്പള്ളി തൊടിയൂര് മണപ്പള്ളി തെക്ക് സ്വദേശി ജയപ്രകാശ് (60) ആണ് കോട്ടയം മെഡിക്കല് കോളജില് മരിച്ചത്.
അല്നസ്മ കരാര് കമ്പനിയുടെ കീഴില് കഴിഞ്ഞ 20 വര്ഷമായി ഗവര്ണര് ഓഫീസിലെ മെയിന്റനന്സ് ഡിവിഷനില് ജോലി ചെയ്യുകയായിരുന്നു. 15 ദിവസം മുമ്പ് പനി ബാധിച്ച് റിയാദിലെ വിവിധ ക്ലിനിക്കുകളിലും ആശുപത്രികളിലും ചികിത്സ തേടിയെങ്കിലും ഫലമുണ്ടായില്ല. തീര്ത്തും അവശനായപ്പോള് സഹപ്രവര്ത്തകര് ആംബുലന്സില് റിയാദ് ശുമൈസി ആശുപത്രിയില് എത്തിച്ചു. അവിടെ കിടത്തി ചികിത്സ നല്കി ഒരുവിധം ഭേദമായപ്പോള് താമസസ്ഥലത്തേക്ക് തിരിച്ചെത്തിച്ചു. എന്നാല് വീണ്ടും ആരോഗ്യസ്ഥിതി വഷളാവുകയും കിടപ്പിലാവുകയും ചെയ്തു.
നെടുമ്പാശ്ശേരി വിമാനത്താവളത്തിലെത്തിയപ്പോള് നാട്ടുകാരനായ അമിതാഭ് പിള്ള ആംബുലന്സുമായെത്തി കൊച്ചയിലെ അമൃത ആശുപത്രിയിലും പിന്നീട് ആസ്റ്റര് ആശുപത്രിയിലും എത്തിച്ചു. അവിടങ്ങളിലെ പരിശോധനയിലും രോഗം എന്താണെന്ന് കണ്ടെത്താനായില്ല. രക്തത്തില് അണുബാധയുണ്ടായതാണ് രോഗകാരണമെന്നാണ് നിഗമനത്തിലെത്തിയത്. ഒടുവില് കോട്ടയം മെഡിക്കല് കോളജ് ആശുപത്രിയില് പ്രവേശിപ്പിക്കുകയായിരുന്നു. അവിടെ ചികിത്സയില് തുടരുന്നതിനിടെയാണ് മരണത്തിന് കീഴടങ്ങിയത്.
ജയകുമാരിയാണ് ജയപ്രകാശിന്റെ ഭാര്യ. മക്കളായ ജ്യോതിയും ചിത്തിരയും വിവാഹിതരാണ്.
