തിരുപ്പതി- രാജ്യത്തിന്റെ മിക്ക ഭാഗങ്ങളിലും മുസ്ലിം വിദ്വേഷം കത്തിക്കാന് ആസൂത്രിത ശ്രമം നടക്കുമ്പോള് ആന്ധ്രാ പ്രദേശിലെ തിരുപ്പതി വെങ്കിടേശ്വര ക്ഷേത്രത്തിന് ഒരു കോടി രൂപ സംഭാവന നല്കി തമിഴ്നാട്ടില്നിന്നുള്ള മുസ്ലിം ദമ്പതികള്. ചെന്നൈ സ്വദേശികളായ സുബീന ബാനുവും ഭര്ത്താവ് അബ്ദുള് ഗനിയുമാണ് 1.02 കോടി രൂപ ക്ഷേത്രത്തിലേക്ക് സംഭാവന നല്കിയത്.
സംഭാവന ഏറ്റുവാങ്ങിയ തിരുമല തിരുപ്പതി ദേവസ്ഥാനം എക്സിക്യൂട്ടിവ് ഓഫീസര് എ.വി റെഡ്ഡി ദമ്പതികള്ക്ക് നന്ദി അറിയിച്ചു. 87 ലക്ഷം രൂപയുടെ ഫര്ണിച്ചറും പാത്രങ്ങളും 15 ലക്ഷം രൂപയുടെ ഡ്രാഫ്റ്റുമാണ് ദമ്പതികള് നല്കിയത്.
പുതുതായി പണികഴിപ്പിച്ച ശ്രീപദ്മാവതി റസ്റ്റ് ഹൗസിലേക്കാണ് ഫര്ണിച്ചറും പാത്രങ്ങളും. 15 ലക്ഷം രൂപ ശ്രീ വെങ്കിടേശ്വര അന്ന പ്രസാദം ട്രസ്റ്റിനാണ് സംഭാവന നല്കിയത്. ട്രസ്റ്റിന്റെ നേതൃത്വത്തിലാണ് ക്ഷേത്രത്തില് എല്ലാ ദിവസവും അന്നദാനം നടത്തുന്നത്.
വ്യവസായിയായ അബ്ദുള് ഗനി ക്ഷേത്രത്തിലേക്ക് മുമ്പും സംഭാവന നല്കിയിട്ടുണ്ട്. 2020 ല് കോവിഡ് മഹാമാരിക്കിടെ ക്ഷേത്രത്തിലെ അണുനശീകരണ പ്രവര്ത്തനങ്ങള്ക്കായി ഇദ്ദേഹം സ്പ്രേയര് ഘടിപ്പിച്ച ട്രാക്ടര് കൈമാറിയിരുന്നു.
A Chennai-based couple Subeena Banu & Abdul Ghani donated Rs 1 cr to Tirumala Tirupati Devasthanams
— ANI (@ANI) September 20, 2022
The donation includes Rs 87 lakh worth of furniture & utensils for the newly constructed Padmavathi Rest House & a DD for Rs 15 lakh towards SV Anna Prasadam Trust (20.09) pic.twitter.com/jdZBfYyJAb
