കന്യാകുമാരി- കേന്ദ്രസര്ക്കാര് നയങ്ങള്ക്കെതിരെ കോണ്ഗ്രസ് മുന് അധ്യക്ഷന് രാഹുല്ഗാന്ധി നയിക്കുന്ന ഭാരത് ജോഡോ യാത്രയ്ക്ക് ഇന്ന് തുടക്കം. കന്യാകുമാരിയില് വൈകീട്ട് അഞ്ചിനാണ് യാത്രയുടെ ഉദ്ഘാടനം. തമിഴ്നാട് മുഖ്യമന്ത്രി എം കെ സ്റ്റാലിനാണ് ഭാരത് ജോഡോ യാത്ര ഉദ്ഘാടനം ചെയ്യുന്നത്. കന്യാകുമാരിയിലുടനീളം രാഹുലിനെ സ്വാഗതം ചെയ്യുന്ന ചുമരെഴുത്തുകളും പോസ്റ്ററുകളും നിറഞ്ഞു.
കോണ്ഗ്രസ് അതിന്റെ ചരിത്രത്തിലെ ഏറ്റവും വലിയ ജനസമ്പര്ക്ക പരിപാടിയിലേക്കാണ് നീങ്ങുന്നത്. ഇന്ത്യയുടെ രാഷ്ട്രീയ ചരിത്രത്തിലും ഇതൊരു വഴിത്തിരിവാകുമെന്ന് വിലയിരുത്തപ്പെടുന്നു.
കന്യാകുമാരി മുതല് കാശ്മീര് വരെ അഞ്ച് മാസം നീളുന്ന പദയാത്രയായാണ് ഭാരത് ജോഡോ. രാജീവ്ഗാന്ധി വീരമൃത്യു വരിച്ച ശ്രീപെരുമ്പത്തൂരില് ഇന്ന് രാവിലെ രാഹുല്ഗാന്ധി പ്രാര്ത്ഥന നടത്തും. ഉച്ചയ്ക്ക് തിരുവനന്തപുരം വിമാനത്താവളത്തിലെത്തിയ ശേഷം ഒരു മണിയോടെ ഹെലികോപ്ടറില് കന്യാകുമാരിയിലേക്ക് തിരിക്കും. ശേഷമാകും യാത്രയ്ക്ക് ഔദ്യോഗിക തുടക്കമാകുക.
രാജ്യത്ത് ഐക്യം ഉറപ്പിക്കാനെന്ന പേരിലുള്ള യാത്ര ലോക്സഭ തെരഞ്ഞെടുപ്പിന് മുമ്പ് കോണ്ഗ്രസിനെ ശക്തിപ്പെടുത്തുന്നത് കൂടി ലക്ഷ്യമിട്ടാണ് നടത്തുന്നത്. പ്രത്യേകം തെരഞ്ഞെടുത്ത 117 കോണ്ഗ്രസ് നേതാക്കളാണ് രാഹുലിനൊപ്പം 3500 കിലോമീറ്റര് പദയാത്രയില് ചേരുന്നത്. എഴുത്തുകാര് , ആക്ടിവിസ്റ്റുകള് അടക്കമുള്ള വിവിധ വിഭാഗങ്ങളില്പെട്ടവരും യാത്രയുടെ ഭാഗമാകും. യാത്രയില് വിവിധ സംസ്ഥാനങ്ങളിലെ കോണ്ഗ്രസ് പ്രവര്ത്തകരുമായി രാഹുല് സംവദിക്കും.
Welcome Rahul Ji#BharatJodoYatra pic.twitter.com/HZDjdD1vyi
— मिले कदम - जुड़े वतन (@DalitCongressUP) September 6, 2022
